Бугарските граѓани треба да знаат дека оваа коалиција и овој состав стои зад нив, порача бугарскиот премиер откако Слави Трифонов реши да излезе од владата
Петков претходно порача дека е подготвен да води малцинска влада, но и оти се надева дека дел од пратениците од партијата на Трифонов ќе останат во владејачката коалиција
Се што зависи од нас ќе направиме за Бугарија да продолжи со истата влада што ја има во моментов. Нема да дозволиме Бугарија да влезе во изборна спирала поради нечие его, задкулисни игри или нешто друго.
Со ваква изјава излезе бугарскиот премиер Кирил Петков по вечерашниот состанок со коалициските партнери, откако Слави Трифонов од Има таков народ (ИТН) денеска реши да излезе од Владата.
Во изјавата пред бугарските новинари Петков порача дека избори не се потребни во период на војна, енергетска и гасна криза, како и во период кога до крајот на годината треба да се усвојат 20-тина закони кои би ѝ овозможиле на Бугарија да добие пари од Брисел.
„Обединети сме и велиме ’не‘ за хаос, ’не‘ на поединечни одлуки кои може да ја фрлат цела држава во криза и ’да‘ за обединетост и за борба против корупцијата. Бугарските граѓани треба да знаат дека оваа коалиција и овој состав стои зад нив и приоритет број еден ќе биде донесување на буџетот“,
рече Петков во кратката изјава по која не сакаше да одговара на новинарски прашања.
Петков стана премиер на Бугарија во декември 2021 година како еден од двајцата предводници на движењето Продолжуваме со промените. Во владината коалиција која траеше само шест месеци со него влегоа и: Има таков народ (ИТН), Бугарската социјалистичка партија (БСП) и Демократска Бугарија.
Откако лидерот на ИТН, Слави Трифонов, објави дека ја напушта Владата, сега коалиција без 25-темина пратеници од партијата на Трифонов, би имала вкупно 109 пратеници, а за мнозинство се неопходни 121 глас во 240-членото Народно собрание.
Петков во изјавата вечера не спомена за евентуални промени во владиниот состав, а во првичната реакција претходно денеска,рече дека е подготвен да предводи малцинска влада.
Во интервју за БТВ, пак, пред коалицискиот состанок тој ја отфрли можноста да бара поддршка од опозициските партии: ГЕРБ на Бојко Борисов која има 59 пратеници; ДПС која е со 34 мандати; и Преродба која има 13 пратеници.
„Ќе бидеме најголеми лажговци ако се свртиме и се договориме со Борисов зад грбот на народот“,
рече Петков.
Сличното го кажа и за ДПС односно дека „нема да може да оди дома и да се погледне во огледало ако направи таков договор“. Во однос на партијата Преродба, пак, проблем се нејзините проруски ставови.
Она во што тој полага надеж за има мнозинство од 121 пратеник, според кажаното во интервјуто за БТВ, се евентуална одлука на 12 од 25-те пратеници што ги има Трифонов, да станат независни и да дадат поддршка на владата.