Премиерот Христијан Мицкоски рече оти СДСМ има позната стратегија со која ги злоупотребува сите колективни или индивидуални несреќи и создава политика од нив
Од СДСМ денеска порачаа оти на родителите од Кочани им е потребна поддршка од Владата, а не навреди
Сакам да предупредам за се поголемата манипулација која се прави со темата Кочани, таму гледаме како едно граѓанско движење за поддршка на Кочани полека преминува во политичко движење, рече денеска премиерот Христијан Мицкоски на партиски настан во Велес.
Тој вели оти нема да дозволи да се прави политика на грбот на како што рече напатениот народ, ниту пак да се злоупотребуваат судбините на еден град саботирајќи го процесот на одговорност за трагичниот настан кој се случи во Кочани. Премиерот рече и дека СДСМ има позната стратегија со која ги злоупотребува сите колективни несреќи, создавајќи политика од нив.
„Таму гледаме полека како едно граѓанско движење за поддршка на Кочани полека преминува во политичко движење, каде од поддршка на жртвите од Кочани ќе видете како говорат за катни гаражи, водоводи канализации, исполнети неисполнети ветувања и се така во духот на локалните избори. Паралелно со тоа тече јавниот преки – суд на прес-конференции на СДСМ“,
рече Мицкоски.
Мицкоски во својот говор рече дека во минатото, СДСМ злоупотребувала и неколку други трагични случаи како смртта на малата Тамара, убиството на Мартин Нешковски, како и жртвите од Смилковско езеро.
„Се сеќавате дека истите ве лажеа, ветуваа правда и мир, на некрофилски начин и тогаш и денеска ги злоупотребуваа трагедиите. И што добија. Тие станаа милионери, а вистината и тогаш и денес е таа дека – единствената и политичка и Владина опција која прави, сочувствува и сака да направи е Владата на ВМРО ДПМНЕ. Да не дозволиме овие некрофили повторно да манипулираат со чоевечки судбина обидувајќи се да се вратат на власт“,
заклучи премиерот.
Конкретно за Кочани, вели дека се помага со дела а не прес-конференции и оти помошта за градот ќе продолжи оти се работи интензивно на проект кој ќе биде од историско значење за градот.
Претходно денеска, од Социјалдемократскиот сојуз на Македонија рекоа дека на родителите на загинатите во пожарот во Кочани им е потребна поддршка од Владата, а не навреди. Реакцијата на опозициската партија доаѓа по денешната прес-конференција на портпаролката на Владата, Марија Митева, која во одговор на новинарско прашање, меѓу другото рече и дека како влада во целост ја разбираат болката на родителите, но и оти за жал се слушнале и лични напади кои политички структури имале за цел да ги искористат во некоја политичка позадина.