Нема активни пожари – тој на планината Готен е ставен под контрола

За гаснење на пожарот на Готен на терен интервенираа специјалните возила на ДЗС, хеликоптерот од Чешка, беровските пожарникари, пожарникарите што ги испрати Словенија и доброволци на „Национални шуми“

Нема активни пожари на територијата на државата, соопштија утрово од Центарот за управување со кризи (ЦУК).

Оттаму велат дека од вкупно 13 регистрирани пожари, 12 се изгаснати, а еден е ставен по контрола.

Станува збор за пожарот на планината Готен од беровска страна, каде што гореле бор, бука, нискостеблеста шума, смрека и ниска вегетација.

За гаснење на овој пожар на терен интервенираа специјалните возила на ДЗС, хеликоптерот на Чешка, беровските пожарникари, пожарникарите што ги испрати Словенија и доброволци на „Национални шуми“.

Пожарот на Готен е единствениот регистриран во државата и е под контрола, вели директорот на ЦУК

Изгаснати се пожарите на териториите на општините Арачиново, Гази Баба, Гевгелија, Кавадарци, Карбинци, Македонска Каменица, Радовиш, Желино и четири во Прилепскиот Регион.

Директорот на Дирекцијата за заштита и спасување Стојанче Ангелов на вчерашната прес-конференција апелираше за внимателност за илинденските празници за да не се предизвикаат пожари.