Советникот во општина Охрид, Нефи Усеини, не смее со своја фирма да учествува на тендерот на кој се бира компанија која ќе ги урива охридските дивоградби – се јави денеска со став Антикорупциска. Соопштението доаѓа откако беше обелоденето дека советникот кој се „прослави“ со пицеријата – дивоградба во строгиот центар на Охрид, инаку заштитено УНЕСКО подрачје, и бетонска база на стариот пат Охрид – Струга, исто така дивоградба, се пријавил на тендер кој во крајна линија би можел да значи дека треба да ги урне сопствените дивоградби.
„Службено лице во вршењето на својата функција, јавни овластувања или должности не може да воспостави деловни односи со правно лице кое е во негова сопственост или во сопственост на член на неговото семејство или во кое тој или член на неговото семејство поседува акции или удели или кое го основал тој или член на неговото семејство или во кое одговорното лице е член на неговото семејство“, стои во соопштението на Антикорупциска.
Ова значи дека фирма која му припаѓа на Усеини или на негови блиски лица, не може да биде деловен партнер на општина Охрид, каде Усеини седи во советничка фотеља како претставник на ДУИ.
Во соопштението понатаму стои дека доколку оваа препорака не се испочитува и фирма на Усеини сепак го добие тендерот, одлуката ќе биде поништена согласно законот за облигациони односи.
Земјава од УНЕСКО доби рок до февруари идната година да достави извештај како напредува заштитата на Охрид, а најгорливата точка е токму енормниот број дивоградби.
Тој извештај ќе биде од витално значење дали Охрид ќе биде прогласен за природно и културно наследство во опасност на сесијата на УНЕСКО во јуни 2020-та.
Во меѓувреме, општина Охрид веќе неколку месеци не може да најде фирма која ќе ги урне дивоградбите, кои според скорешниот регистар ги има 1076, од кои дури 409 во заштитен појас.