Според податоците од ИЈЗ, најмногу заразени има кај возрасната група на лица над 60 години, а најзабележително намалување од 36,3 отсто има во возрасната група 10-19 години
Опфатот на вакцинацијата со две дози кај вкупното население изнесува 46,6 проценти, а со трета само 8,8 отсто
Во текот на изминатата недела (од 15 до 21 август) регистрирани се вкупно 2 686 нови позитивни случаи на ковид-19 во 34 града во земјава, што е намалување од 22,7 проценти во однос на претходната недела, покажуваат податоците од неделниот извештај на Институтот за јавно здравје.
Најголем број од регистрираните случаи, како и досега, се од Скопје, а највисока инциденца е регистрирана во Делчево, Кавадарци, Гевгелија, Пехчево, Охрид, Неготино, Берово и Кратово.
Согласно податоците од ИЈЗ, најзастапена е возрасната група на лица над 60 години. Во однос на претходната недела, регистрирано е намалување кај сите возрасни групи со најзабележително намалување од 36,3 отсто во возрасната група 10-19 години.
Оздравени се 3 197 лица или 14,6 проценти помалку во споредба со претходната недела. Пријавени се 20 смртни случаи, најголем број од Охрид – 5.
Во текот на минатата недела се хоспитализирани 28 лица, а моментално во болниците се лекуваат вкупно 125 ковид-пациенти, 37,2 отсто помалку во споредба со претходната седмица. Од нив 45 се на кислородна поддршка, а еден пациент е на инвазивна/неинвазивна механичка вентилација.
Заклучно со 21 август вакцинирани се вкупно 875 486 лица со барем една доза на вакцина против ковид-19 во државата и странство. Комплетно вакцинирани со две дози се вкупно 856 527 лица.
Со една доза на вакцина против ковид-19, во државата и странство, вакцинирани се 59,5 отсто од населението над 18-годишна возраст, односно 55,2 проценти од население над 12 годишна возраст, додека од вкупното население вакцинирани се 47,7 отсто.
Опфатот со две дози на вакцина против ковид-19 кај населението над 18 годишна возраст изнесува 58,2 проценти, односно 54,0 отсто кај население над 12 годишна возраст. Опфатот со две дози кај вкупното население изнесува 46,6 проценти.
Опфатот со трета доза кај населението над 18 годишна возраст изнесува 11,1 проценти, додека кај населението над 12 годишна возраст е 10,2 отсто. Опфатот со трета доза на вкупното население изнесува само 8,8 проценти.