Пред утрешниот штрајк, Неделков повторно упати апел до сите вклучени во образовниот процес да бидат истрајни и да не се откажуваат од барањата, а тоа се зголемување на платите во образованието за 18,4 отсто
Причините за штрајкот се општо познати, сакам да кажам дека за жал во овој изминат период скоро еден месец, во кој имавме интензивни контакти со надлежните Министерства, па и вклучување на претставници на Владата, како премиерот, вицепремиерот и министерот за финансии, до денеска немаме позитивни резултати во однос на нашите барања. Со оглед на тоа дека одлуката е донесена во согласност со голем број наши членови, неминовно е штрајкот да започне утре, како што беше најавено, изјави претседателот на СОНК, Јаким Неделков на денешната пресконференција во пресрет на утрешниот штрајк.
Иако генералниот штрајк во градинките и училиштата започнува утре, Неделков истакна дека се надева оти претставници на Владата наскоро ќе ги повикаат на разговори за време на кои ќе се изнајде решение за зголемување на платите во образованието.
„Апелирам до владата што побрзо да не повика на преговори, да сфати дека со ваков однос кон вработените кои се од витално значење за државата не се оди никаде, да не повикаат да најдеме заедничко прифатливо решение. Владата што поскоро да го одврзат ќесето, да ги исполнат барањата на синдикатот и што поскоро да започне наставата“,
нагласи Неделков.
Во врска со штрајкот, Неделков порача дека сите штрајкувачи од утре ќе бидат во посебни простории во училиштата и градинките и нема да ја извршуваат својата воспитно-згрижувачка дејност. Тој истакна и дека согласно законот никој нема право да ги присилува наставниците и воспитувачите кои штрајкуваат да се вратат на работа.
„Штрајкот ќе се одвива со неизвршување на работнтие задачи на работното место, штрајкувачите ќе се сместат во простории кои заеднички ќе ги договорат со директорите и нема да ги извршуваат свотие дејности. СОНК нема да ги затвори школите и градинките, нема да изведува воспитна дејност, а одговорноста за организацијата и згрижувањето на децата ја има директорот. Никој нема право да го присилува штрајкувачите да воспитуват деца. Ќе бидат одложени некои активности кои го меѓувреме биле закажани, како наставнички совети, полагање испити, домашни регионални, градски натпревари и се што е поврзано со штрајкувачите“,
истакна Неделков.
Пред утрешниот штрајк, Неделков повторно упати апел до сите вклучени во образовниот процес да бидат истрајни и да не се откажуваат од барањата, а тоа се зголемување на платите во образованието за 18,4 отсто.
„Упатувам апел до колегите да бидат истрајни во барањата, тоа е за нив, за нивните семејства, социјални се прашањата, социјалниот статус на дејностите кои ги покриваме, гордно да застанеме, тука сме ние со правните застапници и ќе имаат правна заштита во секој момент“,
истакна Неделков.