Од Стопанската комора предупредуваат оти во дејностите на кои им е дозволено работење во недела испуштени се суштинските, како градежништвото или трговијата, кај кои е неопходен континуитет во работните процеси, а ваквите примери предупредуваат дека законското решение за недела неработен ден, наместо интенцијата на законодавецот, може да предизвика спротивен ефект – затворање на капацитетите и намалување на бројот работни места
Компаниите самостојно да одлучат дали ќе „одмораат“ во недела или не, согласно динамиката и спецификата на нивната дејност, апелираат од Стопанската комора на Македонија, од каде што додаваат оти треба да се најде посоодветно законско решение од актуелното кое многу фирми става во нерамноправна положба, со што ќе може да се постигне спротивен ефект од оној што сакал да го постигне законодавецот.
„Меѓу дејностите на кои моментално, со таксативното набројување во Законот, им е дозволено работење во недела, испуштени се суштинските, како градежништвото или трговијата (на големо и мало), кај кои е неопходен континуитет во работните процеси. Ваквите примери предупредуваат дека законското решение за недела неработен ден, наместо интенцијата на законодавецот, може да предизвика спротивен ефект – затворање на капацитетите и намалување на бројот работни места“,
велат од Стопанската комора на Македонија.
Оттаму додаваат оти одлуката за недела неработен ден не само што може да предизвика евентуални финансиски загуби, туку ќе претставува и ризик од хаварии, ризик по здравјето на вработените и безбедноста при работа, ќе предизвика намалување на конкурентноста на фирмите, поголема потрошувачка на енергија и зголемени производни трошоци, а можни се и зголемувања на производните трошоци, затворање на капацитетите, намалување на конкурентноста и отпуштања.
Според Стопанската комора, потребна е флексибилност, а акцентот мора да се стави на инспекцискиот надзор и на доследното почитување на работничките права што вклучува и исплата на додаток за работа во недела.
Како што истакна Орде Ѓорѓиоски од „Витаминка“ АД Прилеп, како претставник на прехранбениот сектор, законското решение мора да ја поддржува четирисменската работа.
„Од недоволно јасни причини се утврдија дејностите каде по исклучок, согласно специфики, би можело да се работи во недела, а друг ден да биде за одмор. Не ни е јасно од каде некои дејности се повластени, а некои изземени. Кои биле критериумите? Приватниот сектор во поголем дел е зачуден од ваквото законско решение. Наместо едноставно регулирање, без таксативно наведување на дејностите кои ќе имаат право да работат во недела, вроди со нешто друго – закон со таксативно наброени дејности кои може да работат, а многу се испуштени“,
рече Ѓорѓиоски.
Тој истакна дека ако и натаму дополнително се предвидуваат дејности кои би работеле во недела, само ќе се стимулира правната несигунрост, а Законот ќе биде подложен на чести ревизии и дополнувања. Дополни и дека најдоброто решение би било да се предвиди недела како ден за одмор но без таксативно наведување на дејностите кои би смееле да работат во недела.
„Да се овозможи со пријава до Инспекторатот за труд кои компании сакаат, да работат, но и на работниците да им исплати додаток на плата“,
потенцира Ѓорѓиоски.
На ист став е и Нена Николовска од секторот градежништво која посочи дека новото законско решение не е во интерес на сите работници, бидејќи ја скратува и можноста за заработка на работниците кои сакаат да заработат повеќе.
Стопанската комора предлага и да се преиспита начинот на кој е дефиниран износот на додатокот на плата за работа во недела зашто може да создаде дилеми при утврдувањето на износот.
„Ако се постигне соодветно решение за „недела неработен ден“, Стопанската комора на 18 февруари, на денот на одбележувањето 100 години од своето постоење, ќе ја повлече Иницијативата доставена до Уставниот суд за поведување постапка за оценување на уставноста на Законот за измени и дополнување на Законот за работни односи“,
рече Даниела Михајловска од Комората.