Според неа, се работи за истражувачки проект од чии наоди цел свет може да има бенефит и дека на такви големи проекти нашата земја може да учествува само преку соработка со универзитети кои имаат големи буџети за истражувања
Не мислам дека има пропусти и дека се заобиколени процедурите за постапување кога биле испраќани мозочни ткива од македонски пациенти за истражувања на њујоршкиот Универзитет „Колумбија“ во рамките на неговата соработка со нашиот Медицински факултет, односно Институтот за судска медицина, вели министерката за образование и наука Весна Јаневска.
Таа вели дека станува збор за базична наука и оти не е невообичаено на медицинските факултети кога има потреба да се испрати ткиво за анализа.
„Во апликативната работа, кога имаме случај што не можеме да го решиме, бараме помош од наши колеги кои имаат не само повеќе искуство туку имаат и повеќе можности да направат некаква анализа. Универзитетот ’Колумбија’ е меѓу најдобрите во светот, осми на Шангајската ранг-листа и процедурите за соработка при вакви проекти се исклучително строги“,
изјави Јаневска.
Министерката не гледа потреба МОН да се вклучи во барање документација откако вчера министерот здравство Азир Алиу соопшти дека побарал да се анализираат податоците поврзани со испраќањето на мозочните ткива во САД за истражувачки проект кој почнал во 1996 година.
Сепак, вели дека доколку нешто биде побарано, ќе одговорат во рамките на можностите.
„Стоиме на располагање, иако лично не гледам во што би се вклучиле“,
изјави Јаневска.
На прашање за етичкиот момент во овој проект во однос на дозволите од семејствата на пациентите и дали можело да се случи да се одбие барање, а потоа да се одобри, министерката одговори дека не би можела да каже дали постои такво нешто „освен ако не било дополнето мислењето со факти кои биле барани претходно“.
Како кадар токму од Медицинскиот факултет при УКИМ, таа во друг период членувала во етичка комисија на факултетот чија работа, рече, е многу сериозна и многу сериозно се разгледуваат документите.
„Сум била член на Етичката комисија на Медицинскиот факултет и во мојот мандат не се случило да промениме одлука. Многу е сериозна работата и многу сериозно ги разгледуваме документите. Доколку има потреба нешто да се дополни, поправи, да се направи законски како што треба да биде, тоа се случувало. Додека јас работев на Медицинскиот факултет и додека членував во Етичката комисија, длабоко сум уверена дека не е направен некаков пропуст“,
рече Јаневска.
Според неа, се работи за истражувачки проект од чии наоди цел свет може да има бенефит и дека на такви големи проекти нашата земја може да учествува само преку соработка со универзитети кои имаат големи буџети за истражувања.
„Тој проект работел на изнаоѓање соматски причини за депресија, самоубиства и шизофренија. Знам дека имаше проект за Алцхајмерова болест, кој го водеше Универзитетот ’Колумбија’, и за други проблеми кои и ден-денес не се решени, а ако се решат, бенефит ќе има целото светско население, не само Македонија“,
кажа Јаневска.
Вчера и министерот за здравство Азир Алиу кажа дека е многу е мала веројатноста да имало какви било злоупотреби во случајот со извозот на мозоци од Македонија во САД за научни цели, со оглед на тоа што станува збор за долгогодишен научен проект во кој е вклучена една од најмоќните држави во светот.
Министерот појасни дека неговото министерство е надлежно само за делот на издавање дозволи за влез и за излез на материјали, додека МАНУ, Универзитетот или Институтот спаѓаат под ингеренции на Министерството за образование и наука (МОН). За проектот, кој е од 1996 година, Алиу вели дека би требало да има меморандум потпишан меѓу институциите.
За извозот на мозоци од починати пациенти во земјава за научни цели во САД, јавноста во земјава дозна од документите што американското Министерство за правда ги објави јавно, а се однесуваат на починатиот милијардер осуден за трговија со бело робје, педофилија и силување, Џефри Епстин. Конкретно станува збор за електронска порака испратена до Ике Гроф, основач на инвестициската компанија „Турмалин партнерс“, во која се пренесува новинарско истражување на „Блумберг бизнисвик“ од новинарите Синтија Кунс и Роберт Лагрет.
За овој случај од Јавното обвинителство рекоа дека е отворен предмет по допрен глас, односно по наводите од објавените документи.