На средба со еврокомесарот, лидерот на ВМРО-ДПМНЕ истакнал дека државата уште од 2009 година ги исполнува сите критериуми за старт на преговорите, но спорот со Бугарија е непремостлива пречка, иако Заев, според него, убедувал дека ги затворил сите прашања
Лидерот на ВМРО-ДПМНЕ, Христијан Мицкоски, за време на неговата дводневна посета на Брисел, се сретнал со еврокомесарот за проширување, Оливер Вархеји, при што порачал дека не е таму за да создава пречки туку позитивна клима за патот кон ЕУ, соопштија од партијата.
Мицкоски, велат од ВМРО-ДПМНЕ, истакнал дека државата уште од 2009 година ги исполнува сите критериуми за старт на преговорите, но спорот со Бугарија, е непремостлива пречка, иако Зоран Заев убедувал дека ги затворил сите прашања.
„Не сум тука да создаваме препреки на патот кон ЕУ, туку да создадеме позитивна клима за да државата се придвижи напред, а тоа е можно со чесен и искрен пристап. Патот кон ЕУ нема алтернатива а сè друго ќе претставува купување време и нова лажна надеж од Заев“,
посочил Мицкоски.
На еврокомесарот тој му кажал и оти Владата нема план за излез како од економската така и од политичката криза наметната од застојот на евроинтеграциите.
„Забележливи се и злоупотребите што власта во Македонија ги прави со европските вредности, а најеклатантен пример е воведувањето на поголеми давачки за граѓаните преку злоупотреба на европското знаменце. Таквото однесување нема никаква врска и е спротивно со вредностите на Европската Унија“,
рекол Мицкоски.
На средбата присуствувале и потпретседателот на партијата Александар Николоски и секретарот за меѓународна соработка Тимчо Муцунски.