Претседателката на државата, во интервју за „360 степени“ на МРТ 1, ја коментираше објавата на „Икс“ на шефицата на Европската комисија по неодамнешните средби во Скопје: „Треба да ја направите договорената уставна промена. Топката е во вашиот двор“
Сиљановска-Давкова, сепак, се надева на соломонско решение, за што вели дека му бара помош и на францускиот претседателот Емануел Макрон
На средбата кај мене не стана збор ниту за топка, ниту за двор, ниту за игралиште. Ова е дел од одговорот на претседателката Гордана Сиљановска-Давкова за објавата на Икс на претседателката на Европската комисија, Урсула фон дер Лајен, по последната посета на Скопје:
„Следниот и единствен чекор пред отворањето на преговорите е јасен. Треба да ја направите договорената уставна промена. Топката е во вашиот двор. ЕУ е подготвена“.
Во интервју за „360 степени“ на МРТ 1, претседателката Сиљановска-Давкова вели дека го прашала и премиерот Христијан Мицкоски дали можеби кај него Фон дер Лајен кажала такво нешто, но и тој и одговорил одречно.
„Не, не, ни кај него не зборувале за игралишта и топки. На Твитер тоа излезе. Е сега, низ призма на она што веќе го кажав – видете, топката е реквизит. Освен во уметничката гимнастика, сами со топка, сам со топка никој не игра. Значи, топката е инструмент за игра. За игра се потребни двајца. Играта секогаш се одвива по точно утврдени правила. Правилата не се менуваат во текот на играта, што ни се случи нам. Е сега, што ако е топката од офсајд или што ако е топката со фаул фрлена во игралиштето? Или, што ако голов е празен, нашиот беше празен, па го полнеа, го полнеа, мрежата се искина. Значи, правилата во играта се однапред утврдени. Тоа е прво. Второ, кога мене ме прашуваат однадвор – ‘дали ќе го смените Уставот’, јас не можам таква гаранција да дадам, јас велам не сум јас Јован Безземја, не сум јас апсолутен монарх. Значи, парламентот тоа го прави. А пратениците гласаат по сопствено уверување и ги претставуваат граѓаните, не мене и не ЕУ. Да бидам искрена. Значи кога вие велите сменете го Уставот, професорот во мене вели вака – ‘кога вака ми велите мене, морате да го смените Уставот’, вие ми велите – ‘заборавете на парламентарната демократија, оти таа има неизвесен резултат’… Е сега, тоа е нешто што ме тера на следново. Да подразмислиме, како можело во Преговарачка рамка и во заклучоци да влезат одредби од записник…“
вели Сиљановска-Давкова.
Претседателката деновиве се врати од Париз, каде штоучествуваше на Парискиот мировен форум. Таа рече дека за ова побарала помош од францускиот претседател Емануал Макрон.
„Нормално, јас барам помош од претседателот Макрон, бидејќи придавкава е француски (предлог). Е па, сега, најдете решение. Јас мислам дека, не знам, дека мора да се најде излезно решение, а како што знаете, Европејците, особено и тие во Европската Унија, многу креативни знаат да бидат кога е потребно“,
вели таа.
На прашањето дали нешто во заднина се движи, а јавноста не го гледа, претседателката рече оти се разбира дека се движи.
„Секогаш се движи. Не секогаш движењето е јавно, бидејќи за да заслужите кредибилитет, статус на кредибилитет, не можете да раскажувате за сите работи што се случуваат. Се работи за сериозно прашање, за сериозна пречка во однос на нас. Верувајте ми, најголемиот дел од своето време јас го потрошив на објаснување за што всушност сме ние загрижени, бидејќи однадвор не изгледа така. Најчесто ќе чуете – па вие сами го усвоивте ова решение, и Владата и Собранието и претседателот застанаа зад него, тоа стана дел од Преговарачката рамка и од заклучоците, и сега зошто не го извршувате? Не е баш така. Јас сум била, за среќа или несреќа, пратеничка. Ние не гласавме за Преговарачка рамка или за заклучоци. Пред нас дојде само информација за заклучоците. И толку беше. Значи, таа постапка тотално беше нетранспарентна“,
вели таа.
Претседателката беше прашана и дали според неа има ризици и долгорочни последици по земјава од евентуално брзо зачленување на Црна Гора, а пред сѐ на Албанија, во ситуација во којашто земјава ќе остане надвор од тој процес.
Гордана Сиљановска-Давкова: Добро, ама јас можам, Васко, со контрапрашање да ви одговорам. Има ли ризици па докажани досега, ние уште еднаш да го смениме Уставот, а ништо да не исчекориме повторно?
360 степени: Јас само ве прашав, дали се прават анализи?
Гордана Сиљановска-Давкова: Се прават, се разбира. Затоа ние гледаме интегрално и јас не можам а да не кажам дека сум им неверојатно благодарна на Словенија и на Хрватска. Бидејќи тие се внатре. Меѓутоа, имаат посебна одговорност оти во добро и во зло 50 години сме биле заедно. Тие се иницијаторите и на пријателската група, Вишеградската група е пријателска група. Австрија е пријател, Италија е пријател и јас очекувам да се најде некое соломонско решение.