Сепак, државата веќе работи на сите други неопходни реформи потребни за да се приклучи кон ЕУ. Според него, тоа не е само барање на Унијата, туку и потреба на општеството
Во моментов државата не е подготвена да ги направи уставните измени што ги бара Бугарија, освен ако не добие цврсти гаранции од Европската Унија дека тоа ќе биде нејзино последно вакво барање. Ова во интервју за политичкиот магазин „Политико“, коментирајќи го евроинтегративниот процес на државата, го изјави министерот за надворешни работи и надворешна трговија Тимчо Муцунски, кој изминатите денови се наоѓа во работна посета на Брисел.
„Нашиот став е: Ако ги направиме уставните измени, што ќе се случи ако Бугарија за шест месеци повторно дојде со барања поврзани со историјата, идентитетот или јазикот“,
кажа тој.
Сепак, државата веќе работи на сите други неопходни реформи потребни за да се приклучи кон ЕУ. Според него, тоа не е само барање на Унијата, туку и потреба на општеството.
„Ако утре земјите членки на ЕУ ни кажат дека треба да направиме повеќе во областа на правото или доброто управување, тоа го разбираме. И не само што го разбираме, туку го чувствуваме како наша обврска. Не само по барање на институциите на ЕУ, туку и поради потребата од посилно општество“,
вели министерот.
Муцунски се осврна и на геополитичкиот контекст и нагласи дека ја разбира итноста за интеграција на Украина, но оти не треба да се направи на сметка на Западен Балкан.
„Најбрзата и веројатно најевтината инвестиција во европската стабилност е Европската Унија да ги отвори своите врати што е можно поскоро за целиот регион. Не мислам дека селективното проширување е најдобрата опција“,
рече тој.
Според него, иако постои скептицизам, сепак, проширувањето е сè уште возможно.
„Нашата земја културно, социјално и политички е европско општество. Доколку ги направиме реформите како што треба, не верувам дека ќе има силен отпор за проширувањето за нашиот регион“,
додаде Муцунски.
Потсети дека земјата го започна европскиот пат заедно со Хрватска, но дека таа денес е членка на шенген-зоната и користи евро, а нашата држава сè уште нема отпочнато преговори за членство.
Покрај темите поврзани со членството на државата во ЕУ, Муцунски зборуваше и за поддршката што земјата ја дава за Украина, придонесот во НАТО, како усогласеноста со заедничката надворешна и безбедносна политика на ЕУ.
Муцунски вчера во Брисел оствари средба со еврокомесарката за проширување на Европската Унија, Марта Кос, на која е потврдена силната поддршка за проширување на ЕУ и од страна на земјите членки и од страна на граѓаните на Северна Македонија.