Вицепремиерот Бујар Османи смета дека лажните вести се причина за зголемениот број заразени
Роднини ни се јавуваат да ургираме на Инфективна клиника да не им ги ставаат родителите на респиратор, затоа што има уверување кај луѓето дека ако одат на Инфективна нема да излезат живи од таму, вели вицепремиерот Бујар Османи, илустрирајќи го влијанието на, како што ги нарече, лажните вести за коронавирусот врз граѓаните.
Тој вели дека токму ова е причина што заболените ги кријат симптомите и 33 проценти од хоспитализираните доаѓаат во болница кога е предоцна, односно по 8-9 дена лекување во домашни услови.
„Затоа што некој проширил таква лажна вест дека на Инфективна се убиваат пациенти, денес има луѓе кои одбиваат да се тестираат, сметаат дека тоа е непотребно затоа што вирусот не постои“,
вели Османи.
Тој потенцира дека сега е време Владата радикално и драстично да направи акција против изворите на лажни вести и да се разговара со луѓето на сите можни нивоа да ги отфрлат овие теории на заговор.
„Лажните вести ја искористија психолошката фрагилност на граѓаните од ова преголемо траење на ситуацијата за да можат да наметнат некои лажни идеи“,
рече Османи.
Посочи оти разговарал со новиот поглавар на Исламската верска заедница кому му укажал дека е недозволиво во овој период сите верски авторитети да не комуницираат со луѓето, за да ги отфрлат овие лажни теории на заговор дека вирусот не постои или дека не е опасен, а пријавување на лекар значи опасност по нивниот живот.