Стојаноски порача дека ВМРО-ДПМНЕ нема да води политика на овие случаи, но и дека никој од засегнатите од трагедијата нема да биде оставен сам
Не сакаме да влеземе во сценариото на политизација на трагедијата во која СДСМ упорно сака да нѐ внесе – порача пратеникот од ВМРО-ДПМНЕ, Бојан Стојаноски, во одговор на најавата на опозициската партија дека во Собранието повторно ќе го поднесе предлог-законот за поддршка на настраданите во пожарот во Кочани.
Стојаноски порача дека ВМРО-ДПМНЕ нема да води политика на овие случаи, но и дека никој од засегнатите од трагедијата нема да биде оставен сам.
„Нашиот план за поддршка на засегнатите е следниот – ќе ги дуплираме средствата од Владата за помош на Општина Кочани и реализација на проекти, водиме преговори со инвеститори да отворат капацитети во Кочани или во непосредната близина, а премиерот Мицкоски најави две нови инвестиции и проширување на една актуелна постоечка во близина на Кочани, со 1 000 нови вработувања. Ги покриваме трошоците и лекувањето и ќе продолжиме, а здравствениот систем ќе биде посветен и мотивиран да ги помогне овие луѓе“,
рече пратеникот од ВМРО-ДПМНЕ.
Опозицискиот СДСМ денеска по вторпат го поднесе предлог-законот за поддршка и рехабилитација на настраданите во трагедијата Кочани, овојпат во редовна собраниска постапка. Координаторот на пратеничката група на СДСМ, Оливер Спасовски, рече дека ова не е политички, туку човечки закон, кој не смее да биде предмет на дневнополитички калкулации и дека е одраз на општествена совест, обврска и грижа кон оние што страдаат.
Претходниот обид за носење на законот по скратена постапка не доби поддршка од парламентарното мнозинство.