Ваквото однесување може да се санкционира, вклучително и со одземање на дозволата за работа, порачува гувернерката
Народната банка веќе има засилена контрола врз работењето на менувачниците за да се спречи шпекулативно однесување на одредени менувачници. Гувернерката Анита Ангеловска-Бежоска, во изјава за МИА, посочува дека во тек се засилени инспекциски контроли од страна на Народната банка по менувачниците, кои ги чуваат девизите и не вршат менувачко работење. Ваквото однесување може да се санкционира, вклучително и со одземање на дозволата за работа, порачува гувернерката.
„Нема да дозволиме беспотребно ширење паника и креирање фиктивни притисоци на менувачкиот пазар, поради нечии лични интереси и неодговорно однесување. Девизи на пазарот има. Девизните резерви се стабилни и високи и изнесуваат 3,5 милијарди евра. Банките имаат и свои девизи, и вршат менувачка работа. Впрочем секој граѓанин кој сака, може да купи колку сака девизи и во банките“,
вели Ангеловска-Бежоска.
Од НБМ потсетуваат дека секогаш кога ќе се јави некаква криза, менувачкиот пазар е мета на шпекулантите кои сакаат да профитираат.
Претходно од Банкарската асоцијација апелираа до граѓаните да не прават непотребни трошоци и да не прават масовни замени на денари со девизи бидејќи пазарот е стабилен и девизи има доволно.