Славески додава дека стабилната и ниска инфлација е во интерес на сите – на граѓаните, приватниот сектор и државата, и дека Владата нема интерес од висока инфлација
Во наредната една до две години ќе продолжи процесот на дезинфлација, а инфлацијата ќе се приближи до историските нивоа од околу два отсто. Ова се очекувањата на гувернерот на Народната банка Трајко Славески, кој вели дека стабилноста ќе се обезбеди со преземање монетарни мерки и со одговорна фискална политика.
Според гувернерот, високите инфлациски очекувања кај граѓаните и производителите се еден од клучните фактори што ја одржуваат ценовната динамика.
„Граѓаните и производителите очекуваат раст на цените, што само ја одржува ценовната динамика“,
вели Славески во интервју за Радио Слободна Европа.
Сепак, Славески потенцира дека со постојано преземање на монетарни мерки од страна на Народната банка и со одговорна фискална политика, ќе се обезбеди стабилност и пониска инфлација.
Народната банка, вели тој, ја одржа референтната каматна стапка непроменета од почетокот на годината и презеде мерки за задолжителната резерва, со цел да се стимулира штедењето и да се одржи финансиската стабилност.
Гувернерот нагласи дека трајно пониски нивоа на инфлација може да се постигнат само со внимателна комбинација на монетарни и фискални политики, кои треба да бидат фокусирани на долгорочни капитални инвестиции.
Славески додава дека стабилната и ниска инфлација е во интерес на сите – на граѓаните, приватниот сектор и државата, и дека Владата нема интерес од висока инфлација.