СДСМ наредната недела ќе одлучува и ќе ги разгледува кадровските решенија за новата техничка влада, најави денеска премиерот и лидер на СДСМ Зоран Заев од Пробиштип каде беше на отворањето на леарницата „Кранфилд Фаундри“.
„Намерата беше на последниот централен одбор некаде на средината на декември да се разгледаат кадровските решенија. Јас верувам дека следната недела ќе може да зборуваме за нашите кадровски решенија“, рече Заев.
Тој не прецизираше и не објави имиња кои би ја зазеле позицијата на технички премиер, но и на останатите кадровски решенија кои ќе влезат во новата техничка влада од редовите на СДСМ.
Предвремените парламентарни избори треба да се одржат на 12 април 2020, а според договорот од Пржино, 100 дена претходно треба да се формира и техничка влада.
Ако изборите се одржат на договорениот датум, Заев од премиерската функција треба да си замине на 3 јануари. Техничкиот премиер кој ќе го замени ќе биде од редовите на СДСМ.
Социјадемократите треба да предложат и технички заменици-министри во МВР и во Министерството за труд и социјална политика.
Во овие две институции, министерските места ќе ги добие ВМРО-ДПМНЕ. Опозицијата ќе треба да предложи и заменици во Министерството за финансии, Министерството за земјоделство и Министерството за администрација и информатичко општество.
Ниту од ВМРО-ДПМНЕ, досега не соопштиле кои ќе бидат нивните кадровски решенија.