Напаѓачот, кој се самоуби на местото на настанот, остави порака која требало да се објави на „Јутјуб“, но по интервенција на полицијата беше отстранета од платформата, но според надлежните власти таа не дава целосна слика за можниот мотив за злосторството кој, како што рекоа, можеби никогаш нема да се дознае
Робин Вестман, вооружениот напаѓач кој завчера уби две деца и повреди уште 18 други во католичко училиште во градот Минеаполис во САД, според локалната полиција, најверојатно немал конкретен мотив за злосторството.
Според шефот на полицијата на Минеаполис, Брајан О’Хара, напаѓачот кој отвори оган врз учениците додека присуствувале на миса во црквата во рамките на училиштето „бил опседнат со идејата да убива деца“, пренесе Би-би-си.
„Се чини дека нè мразел сите нас… Повеќе од сè, напаѓачот сакал да убива деца“,
рече О’Хара.
Двете убиени деца се идентификувани како Флечер Меркел (осум години) и Харпер Мојски (десет години).
Нивните родители преку изјави за новинарите и пишани соопштенија ја изразија својата болка од големата загуба, а семејството на Харпер Мојски изрази надеж дека трагедијата ќе поттикне за акција со која ќе се стави крај на вооруженото насилство во Соединетите Американски Држави (САД).
„Ниедно семејство не треба да биде принудено да се соочи со ваква болка… Промената е можна и неопходна – за приказната на Харпер да не стане уште една во долгата низа трагедии“,
рекоа од семејството преку писмено соопштение.
Надлежните органи досега не објавија многу детали за биографијата на осомничениот, освен дека Вестман претходно го посетувал училиштето и дека неговата мајка извесен период била вработена таму.
Според она што досега е познато, 23-годишниот Вестман кобното утро, според локално време, се приближил до зградата на црквата „Благовештение“, во рамките на училиштето, по што испукал десетици истрели кон прозорците користејќи три различни вида оружје.
Полицијата, како што беше соопштено, исто така, пронашла и димна бомба на местото на настанот.
На прес-конференција одржана вчера, вршителот на должноста државен обвинител на САД за Минесота, Џозеф Томпсон, рече дека напаѓачот искажал омраза кон многу заедници и луѓе, вклучувајќи ја и еврејската заедница, како и претседателот Доналд Трамп.
Напаѓачот, кој се самоуби на местото на настанот, остави порака која требало да се објави на „Јутјуб“, но по интервенција на полицијата беше отстранета од платформата, но според надлежните власти таа не дава целосна слика за можниот мотив за злосторството кој, како што рекоа, можеби никогаш нема да се дознае.
„Нема да им давам значење на зборовите на напаѓачот со тоа што ќе ги повторувам, тие се ужасни и гнасни“,
рече обвинителот Томпсон.
Инаку, како што потврди полицијата, Вестман го променил името од Роберт во Робин во 2020 година бидејќи се идентификувал како жена, а оваа негова одлука била потврдена и од судија. Сепак, дел од федералните службеници и полицијата кога говореа за нападот употребуваа машки род за напаѓачот.
Шефот на полицијата во Минеаполис, Брајан О’Хара, рече дека новинарите треба да престанат да го користат името на убиецот бидејќи „целта на неговите постапки била да се здобие со озлогласеност“.
„Како и многу други масовни напаѓачи што премногу често сме ги виделе во оваа земја и низ целиот свет, тој имал извесна нарушена фасцинација со претходните масовни напади“,
рече тој.
Дел од американските функционери со години предупредуваат дека масовните напади може да бидат инспирација за други слични убиства бидејќи убијците се стремат да станат познати преку своите злосторства.
Во таа насока, неколку големи новински организации имаат политика да не ги објавуваат имињата на масовните убијци.
Директорот на Федералното истражно биро, Кеш Пател, го опиша нападот како „чин на домашен тероризам мотивиран од идеологија исполнета со омраза“.
Пател во објава на платформата Икс наведе дека напаѓачот оставил повеќе антикатолички, антирелигиозни референции напишани на оружјето и во белешките откриени од истражителите.
„Субјектот изразил омраза и насилство кон еврејскиот народ, пишувајќи ‘Израел мора да падне’, „Слободна Палестина“ и користејќи експлицитен јазик поврзан со холокаустот“,
напиша тој.
Убиецот, исто така, „напишал експлицитен повик за насилство против претседателот Трамп на рамката од огненото оружје“.
На прес-конференција на истражните органи беше потврдено дека напаѓачот претходно го посетувал училиштето, а неговата мајка, Мери Грејс Вестман, претходно работела во училиштето. Таа, според истражителите, досега не одговорила на обидите на органите за спроведување на законот да ја контактираат.
Тие, исто така, потврдија дека полицијата извршила претреси на три домови поврзани со напаѓачот, кој бил од предградието на Минеаполис.
Службениците додадоа дека оружјето што се користело во нападот било легално купено и дека убиецот не се појавил на ниту еден владин список за следење, како и дека полицијата не била запознаена со некакви дијагнози или третмани.
По нападот, неколку функционери, меѓу кои и градоначалникот на Минеаполис, Џејкоб Фреј, побараа од сојузната држава да донесе забрана за поседување офанзивно оружје.
„Нема причина некој да може да испука 30 куршуми пред дури и да мора да се наполни… Не зборуваме за ловечката пушка на твојот татко, зборуваме за оружја направени да пробиваат оклоп и да убиваат луѓе“,
рече Фреј кој исто така повика на забрана за поседување рамки за муниција со голем капацитет.