„Велигденската трпеза оваа година е полупразна, затоа што е најскапа досега. Ама Мицкоски не објавува мерки за намалување на цените и заштита на животниот стандард, туку чита цени на горивата кои ги утврдува Регулаторната комисија за енергетика“, велат од опозицискиот СДСМ
Наместо мерки за високите цени што постојано растат 45 дена, Мицкоски, македонскиот Далај Лама, повторно излезе со празен, холистички и филозофски настап, без резултати да чита цени на горива од владината говорница. Вака реагираат од опозицискиот СДСМ по денешната прес-конференција на премиерот Христијан Мицкоски.
Мицкоски објави дека очекува новите цени на бензините да бидат пониски за 1,5 денари за литар, а цената на литар дизел гориво да биде пониска за 2,5 денари.
„Месец и половина растат цените. Јагнешкото месо надмина 700 денари за килограм, јајцата, млечните производи, маслото, зеленчукот – сè е поскапено. Основните производи станаа луксуз за огромен дел од граѓаните. Велигденската трпеза оваа година е полупразна, затоа што е најскапа досега. Ама Мицкоски не објавува мерки за намалување на цените и заштита на животниот стандард, туку чита цени на горивата кои ги утврдува Регулаторната комисија за енергетика“,
велат од СДСМ.
Од партијата сметаат дека е очигледно дека Регулаторната комисија не е независна, туку дел од, како што велат, неговата бизнис мрежа.
„Каков дилетант. Веќе 45 дена цените се на високо ниво, без ниту една сериозна интервенција од Владата. Нема мерки, нема план, нема грижа за граѓаните. Резултатот е јасен – граѓаните се оставени сами на себе, токму пред Велигден, со празни фрижидери и полупразни трпези. Оваа Влада на Мицкоски не се бори против скапотијата, туку за бизнис интересите. А граѓаните ја плаќаат цената. ‘Де факто’ и ‘де јуре’ македонскиот Далај Лама ги лаже граѓаните повторно, исто како што лажеше за време на кампањата дека ќе го врати името и клечеше за власт. Сега Македонија е на колена“,
смета СДСМ.