Според директорката на ИЈЗ, Марија Андоновска, во Македонија има низок интензитет на вирусот на грип
Вкупно 767 случаи на случаи на грип или заболувања слични на грип се регистрирани во последната недела, односно во периодот од 23 февруари до 1 март годинава. Бројот на нови случаи на грип, според Институтот за јавно здравје (ИЈЗ), е за 31,1 помал во споредба со претходната недела.
„Во последните недели се забележува тренд на намалување на бројката на заболени и можеме да кажеме дека регистрираната инциденца е во рамки на ниската активност“,
вели директорката на ИЈЗ, Марија Андоновска.
Согласно овие податоци, како што додаде, во Македонија има низок интензитет на вирусот на грип.
Најмногу заболени има во Скопје или 447, во Прилеп и Тетово по 45, во Струмица 39, Штип 30, а во Гевгелија, Охрид, Куманово, Дебар, Струга, Свети Николе, Гостивар, Радовиш, Пробиштип, Кичево, Битола, Кавадарци, Неготино, Македонски Брод, Велес, Крива Паланка, Валандово, бројот на заболени е помал од 30.
Во Демир Хисар, Ресен, Кочани, Берово, Виница, Делчево, Пехчево, Кратово и Крушево нема пријавени лица заболени од грип.
Во сезоната 2025/2026 вкупниот број на случаи на грип или заболувања слични на грип изнесува 15 751, а досега се регистрирани вкупно четири починати лица асоцирани со грип.
Заклучно со минатата недела, во Македонија, вакцинирани се вкупно 79 119 лица со бесплатна
или комерцијална вакцина.