Украинскиот претседател Володимир Зеленски го нарече нападот одвратен, велејќи дека Москва продолжува да покажува дека сака војна, а не мир
Најмалку четири лица, меѓу кои и 12-годишно девојче, загинаа во масовен ракетен напад што Русија рано утринава го изврши врз украинскиот главен град Киев. Во нападот е оштетена и цивилна инфраструктура.
Украинскиот претседател Володимир Зеленски објави дека во масовниот руски напад се употребени околу 500 дрона и 40 ракети, насочени главно кон цивилна инфраструктура во неколку украински региони.
Го нарече нападот одвратен, велејќи дека Москва продолжува да покажува дека сака војна, а не мир.
„Дивјачки напад, намерен, насочен терор врз обични градови. Москва сака да продолжи да се бори и да убива и заслужува најсуров притисок од светот. Кремљ има корист од продолжувањето на оваа војна и терор сè додека заработува приходи од енергија и управува со флота во сенка“,
додаде украинскиот претседател.
Градоначалникот на Киев, Виталиј Кличко, изјави дека во нападот се погодени и медицински објект и градинка.
Официјални лица од Москва негираат дека целта на нападите била цивилна инфраструктура.