Судирот на возовите РЕКС 1814, кој сообраќал од Нитра до Братислава, и Екс 620, кој сообраќал на линијата Кошице – Братислава, се случил околу 19:30 часот, кога еден од возовите поминал на црвено светло
По судирот на два воза што се случи вчера попладне во близина на градот Пезинок во Словачка, најмалку 79 лица завршија во болницa, а три се со тешки повреди на градниот кош и стомакот, соопшти денеска Словачкиот центар за итни медицински операции.
Судирот на возовите РЕКС 1814, кој сообраќал од Нитра до Братислава, и Екс 620, кој сообраќал на линијата Кошице – Братислава, се случил околу 19:30 часот, кога еден од возовите поминал на црвено светло.
Исто така, се наведува дека 60 пациенти се здобиле со полесни повреди и дека во двата воза имало вкупно 800 патници.
„Петнаесет амбулантни возила интервенирале на лице место, а 79 пациенти биле пренесени во болници. По првичната помош, тие биле пренесени во болниците во Крамер и Ружинов во Братислава. Сите биле свесни“,
соопшти Одделот за итни случаи.
Министерот за здравство Камил Шашко изјави дека возовите превезувале околу 800 луѓе, претежно студенти.
Полицијата потврди дека немало жртви во несреќата. Двајцата машиновозачи биле алкотестирани и тестирани за дрога, а нивните резултати биле негативни.
Директорот на Словачките железници, Иван Беднарик, изјави дека морале да ги почекаат резултатите од истрагата и дека сè уште не е јасно дали станува збор за техничка или за човечка грешка.
По железничката несреќа на делницата Пезинок – Свати Јур, сообраќајот беше целосно прекинат околу три часа, а од утрово неколку железнички линии доцнат помеѓу 30 и 50 минути.
Словачкиот премиер Роберт Фицо им посака на повредените брзо закрепнување и нагласи дека случајот бара темелна истрага. Тој, исто така, свика вонредна владина седница на која, како што рече, треба да се донесат потребните одлуки.