Поради големиот број повредени, кои се бројат на десетици, во локалните болници е прогласена вонредна состојба, пренесува АФП
Најмалку 30 лица ги загубија животите, а десетици други се повредени кога патнички воз денеска излета од шините во Јужен Пакистан, соопштија властите на земјата, јавуваат светските агенции.
Поради големиот број повредени, во локалните болници е погласена вонредна состојба, пренесува АФП.
Несреќата се случила во близина на железничката станица „Сахара“, во близина на градот Навабшах во јужната провинција Синд.
„Ова е навистина голема несреќа“,
изјави министерот за железница Хаваџа Саад Рафике за медиумите.
Според министерот, во возот „Хазара експрес“ имало најмалку илјада патници кога излетал од шините на дел од пругата, каде што претходно немало пријавено никакви проблеми.
„Постојат две можни причини – механички дефект или некој направил дефект. Можна е саботажа“,
рече Рафик.
Тој најави дека ќе биде спроведена истрага која ќе треба да ги утврди точните причини за несреќата.
Во несреќата, според локалните медиуми, осум вагони излетале од шините.
Инаку, како што пренесуваат агенциите, „’Хазара експрес’ е патнички воз кој секојдневно патува 33 часа од пристанишниот град Карачи на југ, до Хавелиан, во провинцијата Кајбер Пахтунхва, која се наоѓа на север, на оддалеченост од околу 1 600 километри.
Железничките несреќи се чести во оваа земја, која има речиси 7 500 километри железница, која годишно превезува повеќе од 80 милиони патници.
Во јуни 2021 година, два воза се судрија во близина на Дахарки во провинцијата Синд, при што загинаа најмалку 65 луѓе, а беа повредени околу 150.
Најмалку 75 патници загинаа во пожар во експресниот воз „Тезгам“ во октомври 2019 година, додека во судир на два воза во Готки во 2005 година загинаа повеќе од 100 луѓе.