Шефот на полицијата во Ахмедабад изјави дека досега од местото на несреќата се извлечени 204 тела, но сè уште не е јасно дали сите биле во авионот или некои биле во околината на местото на кое се урна патничкиот „боинг 787“. Дел од локалните медиуми јавуваат дека сите 242 патника во авионот, вклучувајќи ги двајцата пилоти и десетте члена на екипажот загинале во најголемата авионска несреќа во светот во последната деценија
Најмалку 200 лица загинаа при уривањето на патничкиот авион на „Ер Индија“, кој веднаш по полетувањето од аеродромот во индискиот град Ахмедабад удри во зграда на лекарски дом во непосредна близина. Се работи за објект на медицински колеџ во кој биле сместени студенти по медицина.
Шефот на полицијата во Ахмедабад изјави дека досега од местото на несреќата се извлечени 204 тела, но сè уште не е јасно дали сите 204 лица биле во авионот или некои биле во околината на местото на кое се урна патничкиот „боинг 787“. Дел од локалните медиуми јавуваат дека сите 242 патника во авионот, вклучувајќи ги двајцата пилоти и десетте члена на екипажот загинале во најголемата авионска несреќа во светот во последната деценија.
Меѓу патниците на летот од Ахмедабад до Лондон имало 217 возрасни, 11 деца и две бебиња. Од нив 169 биле индиски државјани, 53 Британци, седум Португалци и еден Канаѓанец.
Според извештајот на Индиската федерација на медицински здруженија на Индија, околу 50 до 60 студенти кои студираат медицина се однесени во болница откако авионот на „Ер Индија“ се урна во лекарскиот дом. Пет студенти се водат за исчезнати, а најмалку двајца се на одделение за интензивна нега.
Портпаролот на индиското Министерство за надворешни работи, Рандхир Џаисвал, на својот неделен брифинг за медиумите рече дека несреќата е многу трагична и дека се загубени многу животи.
„Спасувачките операции се во тек. Треба да почекаме уште малку време за да бидат објавени точните детали. Изгубивме многу луѓе. Им изразуваме најдлабоко сочувство на сите кои ги загубија своите најблиски“,
рече тој.