Не е јасно колку долго би можел да трае новиот израелски воен упад во пространиот северен град Газа, кој сега е во голема мера сведен на урнатини. Но, планот на израелскиот премиер Бенјамин Нетанјаху за проширување на воената контрола врз Газа, кој се очекува да започне во октомври, предизвика глобален бес поради широкото уништување на територијата и гладот што се шири меѓу двата милиони луѓе во Газа чии домови се уништени од израелското бомбардирање
Израелските авиони и тенкови продолжија да го бомбардираат источниот дел од Газа во текот на ноќта, при што загинаа најмалку 11 лица, изјавија денеска сведоци и лекари, а водачот на Хамас, Калил ал Хаџа, треба да дојде во Каиро за да разговара за оживување на планот за прекин на огнот поддржан од САД.
Последната рунда индиректни разговори во Катар кон крајот на јули беше во застој, при што Израел и палестинската милитантна група Хамас се обвинуваа меѓусебно за недостигот на напредок во врска со предлогот на САД за 60-дневно примирје и договор за ослободување на заложниците.
Израел соопшти дека ќе започне нова офанзива за преземање на контролата врз Газа, кој го освои кратко време по избувнувањето на војната во октомври 2023 година, пред да се повлече. Членовите на Хамас се прегрупираа и оттогаш водат претежно герилска војна.
Не е јасно колку долго би можел да трае новиот израелски воен упад во пространиот северен град Газа, кој сега е во голема мера сведен на урнатини. Но, планот на израелскиот премиер Бенјамин Нетанјаху за проширување на воената контрола врз Газа, кој се очекува да започне во октомври, предизвика глобален бес поради широкото уништување на територијата и гладот што се шири меѓу двата милиони луѓе во Газа чии домови се уништени од израелското бомбардирање.
Тоа, исто така, предизвика критики во Израел. Началникот на Генералштабот на армијата предупреди дека планот би можел да ги загрози преживеаните заложници и да се покаже како смртоносна стапица за израелските војници. Исто така, предизвика страв од понатамошно раселување и тешкотии меѓу околу еден милион Палестинци во регионот на градот Газа.
Сведоците и лекарите изјавија дека израелските авиони и тенкови повторно го нападнале источниот дел на Газа преку ноќ, при што загинале седум лица во две куќи во предградието Зејтун и четири во станбена зграда во центарот на градот.
На југот од енклавата пет лица, вклучувајќи родители и нивно дете, биле убиени во израелски воздушен напад врз куќа во градот Кан Јунис, а четири во напад врз бегалски камп во блискиот крајбрежен град Маваси, соопштија лекарите.
Израелската војска денеска соопшти дека нејзините сили убиле десетици милитанти во северна Газа во текот на изминатиот месец и уништиле неколку тунели што ги користеле милитантите во областа.
Уште пет лица, меѓу кои и две деца, починаа од глад и неухранетост во Газа во изминатите 24 часа, соопшти Министерството за здравство на територијата. Овие случаи го зголемија бројот на смртни случаи на 227, меѓу кои и 103 деца, од почетокот на војната, додаде Министерството.
Израел ги оспорува бројките на смртни случаи од неухранетост објавени од Министерството за здравство во енклавата управувана од Хамас.
По нападот врз јужен Израел предводен од Хамас на 7 октомври 2023 година, во кој беа убиени 1 200 луѓе, а 251 заложник беа земени, израелската армија уби повеќе од 61 000 Палестинци во копнени и воздушни напади во Појасот Газа, опустоши голем дел од енклавата и предизвика хуманитарна катастрофа со сериозен недостиг на храна, вода за пиење и засолниште.
Нетанјаху, чиишто крајнодесничарски, ултранационалистички коалициски сојузници сакаат целосно преземање од страна на Израел и преселување на Газа, рече дека војната нема да заврши сè додека Хамас не биде искоренет.
Палестински функционер запознаен со преговорите за прекин на огнот изјави дека Хамас е подготвен да се врати на преговарачката маса.
Сепак, разликите меѓу страните по клучните прашања се чини дека остануваат големи, вклучувајќи го обемот на повлекувањето на израелската војска и барањата Хамас да се разоружи, што групата го отфрли пред да воспостави палестинска држава.
Арапски дипломат изјави дека медијаторите Египет и Катар не се откажале од оживување на разговорите и дека одлуката на Израел да го објави својот нов офанзивен план за градот Газа можеби не е блеф, туку начин да го врати Хамас на преговарачката маса.