Најмалку 15 загинати по судир меѓу брод на грчката крајбрежна стража и глисер со мигранти кај островот Хиос

До полноќ, службите за итни интервенции во болница префрлиле 24 мигранти, вклучувајќи две бремени жени, како и двајца припадници на крајбрежната стража кои претрпеле полесни повреди

Најмалку 15 лица се загинати, а десетици други се повредени откако доцна синоќа брод на грчката крајбрежна стража се судрил со глисер што превезувал мигранти кај источниот егејски остров Хиос, соопштуваат грчките власти.

Инцидентот се случил додека глисерот, за кој се верува дека го управувале шверцери на мигранти, се обидел да се приближи до областа Мирсиниди на источниот брег на островот за да ги истовари патниците. Притоа се судрил со бродот на крајбрежната стража. Поради силниот судир, глисерот се превртел и потонал, при што сите патници паднале во морето.

Висок грчки функционер, како што пишува грчкиот „Катимерини“, изјавил дека бродот превезувал околу 30 лица и имал мотор со голема моќност. Тој бил откриен од патролен брод на крајбрежната стража што дејствувал од блиските острови Оинусес.

До полноќ, властите потврдиле 15 смртни случаи од кои 11 мажи и четири жени, а предупредиле и дека бројот на жртви може да се зголеми. Крајбрежната стража соопшти дека е во тек операција за пребарување и спасување, со помош на бродови на крајбрежната стража, приватни бродови и нуркачи.

Амбулантни возила биле стационирани во пристаништето Хиос, превезувајќи ги повредените преживеани до Општата болница Скилицеио на островот. До полноќ, службите за итни интервенции во болница префрлиле 24 мигранти, вклучувајќи две бремени жени, како и двајца припадници на крајбрежната стража кои претрпеле полесни повреди.

Тројца од хоспитализираните мигранти наводно биле оперирани поради тешки повреди на виталните органи.

Според официјални лица, станува збор за еден од посериозните инциденти во последните години.