Организациите за човекови права „Амнести интернешнл“ и „Хјуман рајтс воч“ ја повикаа воената хунта во Мјанмар да дозволи хуманитарна помош. Претходно, хунтата направи редок потег да побара меѓународна помош откако прогласи вонредна состојба во шест региони од земјата
Најмалку 144 лица загинаа, а 732 се повредени во силниот земјотрес што денеска го погоди Мјанмар, пренесува Ројтерс.
Земјотрес со јачина од 7,7 степени според Рихтеровата скала го погоди Мјанмар, соопшти Американскиот геолошки институт (УСГС). Стотици луѓе во тајландската престолнина Бангкок во паника излегоа од зградите откако почувствуваа дека земјата се тресе.
Епицентарот бил на околу 17,2 километри од градот Мандалеј, кој има околу 1,2 милиони жители. Околу 12 минути по првиот земјотрес, втор силен последователен потрес со јачина од 6,4 степени ја погоди областа.
Сликите од Мјанмар покажуваат оштетени патишта со големи пукнатини.
Организациите за човекови права „Амнести интернешнл“ и „Хјуман рајтс воч“ ја повикаа воената хунта во Мјанмар да дозволи хуманитарна помош. Претходно, хунтата направи редок потег да побара меѓународна помош откако прогласи вонредна состојба во шест региони од земјата.
Црвениот крст изрази загриженост за големите брани во земјата.
„Оштетена е јавната инфраструктура, вклучувајќи патишта, мостови и јавни згради. Во моментов сме загрижени поради големите брани, кои внимателно се следат за да се процени нивната состојба“,
рече Мари Манрике, програмски координатор на Меѓународната федерација на Црвениот крст.
Светската здравствена организација (СЗО) подготвува медицински материјали и го активира својот систем за управување со итни случаи, а соопшти и дека го мобилизира својот логистички центар во Дубаи за да обезбеди материјали за повредените.
Претседателката на Европската комисија, Урсула фон дер Лајен, рече дека Европската Унија е подготвена да помогне, а помош понудила и Франција, додавајќи дека нејзините дипломатски простории во главниот град на Тајланд се евакуирани.
Британскиот министер за надворешни работи Дејвид Лами ги советуваше британските граѓани во Мјанмар и Тајланд да ги следат владините препораки.
Папата Франциск упати молитви за жртвите, велејќи дека е „длабоко тажен поради загубата на животи и широко распространетото уништување“ предизвикано од земјотресот.