Синдикалците и министерката за труд и социјална политика велат дека се на иста линија во однос на новиот системски закон за работни односи, од кој се оекува да врати многу работнички права кои биле изгубени во изминатите години
Договорите за работа на определено време да не траат подолго од една година, а породилното отсуство да трае најмалку 12 месеци, ковид-19 да се третира како професионално заболување и да се иплаќа цела плата за боледување, како и укинување на членот од законот кој овозможува работодавачот да ангажира работник да работи прекувремено три месеци, а за тоа да не му плати… Тоа се барањата од кои нема да отстапат од Сојузот на синдикати, како што најавуваат оттаму, при донесувањето на новиот закон за работни односи.
Претседателот на ССМ, Дарко Димовски, на прес-конференцијата по денешниот состанок со министерката за труд и социјална политика Јагода Шахпаска, рече дека разговарале за спорните прашања за кои со работодавачите не успеале да постигнат договор, но оти имаат оддршка од Министерството.
„Бараме договорите за работа на определено време да не траат подолго од една година, бидејќи по овој основ, за време на ковид-пандемијата, изгубивме речиси 70 отсто од работните места, а со тоа оставивме голем број работници без основна егзистенција. По истекот на една година, бараме Агенцијата за вработување по автоматизам да го трансформира односот од неопределено во определено време“,
рече Димовски.
Тој вели дека ќе настојуваат ковид-19 да се третира како професионална болест, па и во приватните фирми тие што ќе одат во изолација или самоизолација да добиваат 100 отсто од платата, а не 70 како да се на боледување.
„Во основниот Закон за работни односи бараме и да се изостави членот 117, став 2, кој овозможува работодавачот да ангажира работник три месеци прекувремено, а за тој период да не му биде платено. Знаеме дека таму стои дека работодавачот може при зголемен обем на работа да ангажира работници, па сите го прават тоа, посебно во приватниот сектор, па сметаме дека ова е нефер член во законот и бараме негово укинување“,
вели Димовски.
Тој рече дека со министерката се усголасиле целосно по прашањето за недела неработен ден. За работење во недела се предвидува дневница зголемена за 100 проценти од основната и слободен ден. Работниците, пак, од дејностите на кои поради, спецификата или неопходноста за фунционирање на државата, ќе им биде дозволено да работат во недела ќе добиваат дневница зголемена за најмалку 50 проценти и слободен ден. Договорено е и да се работи само во една смена од 10 до 18 часот.
На средбата било договорено и со колективен договор здравствените работници да можат да користат годишен одмор до 36 дена.
„Со МТСП сме на иста линија, но треба да седнеме со работодавачите и, врз основа на тие факти, да кажеме дека е тоа неоходно за да функционира ова општество, бидејќи знаеме дека, во време на ковид-19, работниците ги изгубија работните места и сакаат да ја напуштат државата. Ние само преку фундаменталниот закон за работни односи и колективните договори може да ги заштитиме“,
рече претседателот на ССМ и додаде дека се надева дека законот ќе биде донесен уште во текот на годинава.
Денешната средба, нагласи Димовски, беше од стратешки карактер, нагласувајќи дека со донесувањето на новиот закон за работни односи ќе се вратат многу работнички права кои биле изгубени во изминатите години.
Министерката за труд и социјална политика, Јагода Шахпаска вели дека од првиот ден на нејзиниот мандат има јасна определба отворено да разговара за сите прашања кои се од интерес на работниците.
„Законските решенија треба да обезбедат почитување на работничките права, затоа што, мотивиран работник е работник кој работи според јасно определени и дефинирани работни односи, на кој му се почитуваат правата во делот на користење годишен одмор, слободни денови, ден на неделен одмор, како и безбедност во работата“,
нагласи Шахпаска.
Таа посочи дека работни групи, составени од претставници на синдикатите, репрезентативни и нерепрезентативни, како и од Организацијата на работодавачи, експерти од академската јавност, меѓународни експерти и Меѓународната организација на трудот, работат на новиот системски закон за работните односи. Таа истакна дека ова законско решение е во финална фаза и наскоро ќе биде отворена широка јавна дебата, со цел да се слушне мислењето на пошироката јавност.