Пред ескалацијата, која започна со бран експлозии на пејџери минатиот вторник, а потоа и на воки-токи, од октомври во Либан беа убиени околу 600 луѓе, главно борци, но и повеќе од 100 цивили
Либанското Министерство за здравство објави дека 100 луѓе загинале, а повеќе од 400 се ранети во денешните израелски напади врз Хезболах, во најсмртоносниот ден во Либан од почетокот на конфликтот во октомври, пренесува АП.
Израелската војска објави дека денеска погодила 300 цели во Либан во еден од најинтензивните воздушни напади во речиси една година борба против милитантната група Хезболах.
Пред ескалацијата, која започна со бран експлозии на пејџери минатиот вторник, а потоа и на воки-токи, од октомври во Либан беа убиени околу 600 луѓе, главно борци, но и повеќе од 100 цивили.
Претходно денеска, Израел ги повика жителите на јужен Либан да ги евакуираат домовите и другите згради за кои тврди дека Хезболах во нив складира оружје, најавувајќи дека војската ќе изврши „широки напади“ против милитантната група.
Тоа беше прво предупредување од ваков вид во речиси една година континуирана ескалација на конфликтот, и по особено силната размена на оган во неделата.
Хезболах лансираше околу 150 ракети, проектили и беспилотни летала во северен Израел како одмазда за нападите во кои загинаа висок командант и десетици борци.
Новинарите на Асошиејтед прес во јужен Либан известија за силни воздушни напади во многу области во понеделникот наутро, вклучително и некои далеку од границата.
Либанското Министерство за здравство побара од болниците во јужен Либан и во источната долина Бека да ги одложат операциите кои не се итни за да бидат подготвени за лекување на ранетите во „пошироката агресија на Израел против Либан“, според АП.