Најмалку 100 севернокорејски војници се убиени во борбите во областа на Курск, велат од украинското Министерство за одбрана

Ниту Северна Кореја ниту Русија официјално не го признаваат распоредувањето на војниците или испораката на оружје

Најмалку 100 севернокорејски војници што беа распоредени во Русија се убиени, а уште 1 000 се ранети во борбите против украинските сили за време на интензивните судири во областа на Курск, пренесува Ројтерс.

Оваа загуба се припишува на недостигот на искуство на севернокорејските војници во војување со беспилотни летала и нивната недоволна снаодливост на отворен терен каде што се впуштаат во борба.

Постојат наводи дека Северна Кореја се подготвува за дополнително распоредување на своите војници, како и дека севернокорејскиот лидер Ким Џонг Ун ја надгледува воената обука.

(ВИДЕО) Северна Кореја негира дека ѝ испраќа војници на Русија, на социјалните мрежи се појавуваат снимки што го тврдат спротивното

Повеќе од 10 000 севернокорејски војници се распоредени да ѝ помогнат на Русија во војната. Пјонгјанг, исто така, испорача повеќе од 10 000 контејнери со артилериска муниција, противтенковски проектили и моторизирани хаубици и ракетни фрлачи.

Ниту Северна Кореја ниту Русија официјално не го признаваат распоредувањето на војниците или испораката на оружје.

Според украинското Министерство за одбрана, севернокорејските војници во областа Курск продолжуваат да претрпуваат големи загуби во борбите, додека украинската армија веќе започнала нови офанзивни операции за неутрализирање на преостанатите позиции.

Украинскиот претседател Володимир Зеленски ја обвини Русија дека се обидува да ги прикрие загубите на севернокорејските војници, велејќи дека украинските трупи ќе продолжат да преземаат мерки за да ги ослабат борбените способности на силите.