„Најпрво побаравме лекарска помош во Кавадарци, но ми се чини дека нашата ситуација не беше сфатена сериозно. Затоа бараме да се формира комисија што ќе ги утврди точните околности под кои настанала смртта. Детето ни почина во рацете“, вели таткото на починатото дете во изјава за МИА
Ги повикуваме надлежните во државата да испитаат можна лекарска грешка во врска со смртта на нашето дете, бараат родителите на тригодишното дете од Кавадарци, што вчера рано наутро почина на пат кон скопските клиники.
Таткото на детето, Тони Стојанов во изјава за „Медиумската информативна агенција“ (МИА) бара да се формира комисија што ќе ги утврди точните околности под кои настаната смртта.
„Во понеделникот сабајлето во дваесет минути за три часот ме разбуди сопругата со детето во рацете омалаксано и ми рече да станам брзо оти не е арно синчето. Најпрво побаравме лекарска помош во Кавадарци, но ми се чини дека нашата ситуација не беше сфатена сериозно. Затоа бараме да се формира комисија што ќе ги утврди точните околности под кои настанала смртта. Детето ни почина во рацете“,
вели тој.
Од полицијата соопштија дека тригодишно дете починато е донесено на комплексот клиники „Мајка Тереза“ во Скопје.
„Неговата мајка Т.Ѓ.С.(36) од Кавадарци изјавила дека околу 3:00 часот го однела во Општата болница Кавадарци, од каде ги упатиле во Клиниката за детски болести при Комплекс клиники ‘Мајка Тереза‘ во Скопје, каде што во 8:45 часот била констатирана смрт“,
се вели во полицискиот извештај.
Досега, како што информира МИА, нема официјален одговор за овој случај од медицинските лица.