Во изминативе три дена во земјава се регистрирани вкупно 659 случаи на ковид-19, а поради зголемената бројка Владата усвои нови рестриктивни мерки со цел спречување на ширењето на вирусот.
Комисијата за заразни болести препорача, а Владата усвои неколку нови мерки кои предвидуваат забрана на гостување на пејачи и ограничување на јачината на музиката и на бројот на гости во угостителските објекти. Се намалува и бројот на луѓе што може да седат на една маса во угостителски објект, од сега дозволените 12 на четири.
Покрај ова, ќе се инсистира на строго почитување на точка 3 од Протоколот за отворање и работа на угостителските објекти и од Протоколот за отворање и работа на кафетериите, со која не е дозволено послужување гости на стоење на шанк и стоечки маси.
Владата го прифати и укажувањето на Комисијата за потребата од строго почитување на забраната за работа на ноќни барови и дискотеки и потребата од преземање ригорозни мерки од страна на надлежните институции во случај на прекршување на забраната.
Министерот за здравство Венко Филипче оцени дека ваквите мерки се апсолутно оправдани и дека сега е добар период кога треба да се имплементираат.
Според податоците од Министерството за здравство, во деноноќието меѓу саботата и неделата се направени 1 350 тестирања и регистрирани се 191 нов случај на ковид-19, со што вкупната бројка на активни случаи во нашата земја изнесува 2 693, откако во петокот беа регистрирани 225, а во саботата рекордни 243 нови случаи.
Рекордер по активни случаи е главниот град со 966, по што следуваат Кочани – 183, Куманово и Струмица по 181, Тетово – 161 и Прилеп – 147. Во овие шест града се над 67 проценти од сите активни случаи.