Телото на папата ќе остане изложено во базиликата „Свети Петар“ во Ватикан до доцна вечерва, по што ковчегот ќе биде запечатен пред утрешниот погреб
Повеќе од 128 илјади луѓе деновиве ја посетија базиликата „Свети Петар“ во Ватикан за да му оддадат последна почит на папата Франциск кој почина во понеделникот. Неговото тело во средата наутро беше пренесено од гостинската куќа „Санта Марта“, каде што престојуваше и почина, во базиликата „Свети Петар“.
Телото на папата ќе остане изложено во базиликата до доцна вечерва, по што ковчегот ќе биде запечатен.
Почетокот на погребната церемонија на папата Франциск е закажана за утре во 10 часот на плоштадот пред базиликата „Свети Петар“ во Ватикан, а неговото тело потоа ќе биде пренесено во базиликата „Санта Марија Маџоре“ во Рим каде што ќе се одржи самиот погреб.
Франциск ќе стане првиот папа кој ќе биде погребан надвор од Ватикан по повеќе од 100 години, откако во својот последен тестамент тој изрази желба да биде погребан во базиликата „Санта Марија Маџоре“ во Рим. Папата бара неговата гробница да биде во земја, да е едноставна, без посебна декорација и со натпис – „Franciscus“.
На погребот на папата се очекува да присуствуваат над 200 илјади луѓе, меѓу кои 130 делегации, околу 50 шефа на држави и десет владејачки монарси.