За време на проверките акцентот бил ставен на учесниците во сообраќајот што управуваат мотоцикли
За осум часа скопската полиција констатирала вкупно 128 сообраќајни прекршоци. Контролата, како што велат од Министерството за внатрешни работи (МВР), била спроведена вчера во рамките на засилената акција „Безбеден сообраќај“ во периодот од 17 до 1 часот.
За време на проверките акцентот бил ставен на учесниците во сообраќајот што управуваат мотоцикли.
Кај мотоциклистите биле изречени 94 мерки, а најчести прекршоци биле возење без заштитна кацига, без возачка дозвола и без положен испит за познавање на сообраќајните правила и прописи.
Полицијата санкционирала и возачи на патнички и товарни возила кои возеле без дозвола, под дејство на алкохол, или не застанале на даден знак „стоп“ од страна на полициски службеници.
Во текот на контролата полициски службеници лишиле од слобода едно лице, Д.Љ., кај кого при преглед бил пронајден кокаин.
Од полицијата најавуваат дека ваквите засилени контроли ќе продолжат и во наредниот период.