Бројките на новозаразени ии на починати секојдневно растат, а властите препорачуваат вакцинација на што повеќе граѓани како единствен начин да се прекине ланецот на зараза
Бројот на активни случаи на ковид-19 во земјавa изнесува 10 380, од кои над половина или 5 562 се регистрирани само во последните пет дена. Една третина од активните случаи се во Скопје – 3 421, додека над 64 проценти се само во три града – Скопје, Тетово и Гостивар.
Болниците во Тетово и Гостивар се преоптоварени, а секој пациент на кој што му е потребно болничко место, по претходна најава се праќа во Скопје. Болничките капацитети се делумно оптоварени и во Кичево и Струга.
Министерот за здравство Венко Филипче вели дека ова нема да престане додека поголем дел не се вакцинираат и ги повика граѓаните тоа да го направат што поскоро,
„Има јасни меѓународни препораки од релевантни институции дека природниот имунитет по прележување на болеста со тек на време се намалува, а вакциналниот имунитет е потраен. Сите препораки укажуваат за што пократко време луѓето да се имунизираат. Така ќе се зголеми степенот на вакцинација и ќе се постигне колективен имунитет. Треба да спречиме следни бранови, ова мора да го прекинеме, изјави вчера Филипче.
Над 650 илјади граѓани досега примиле барем една доза вакцина, а поради зголемениот интерес за вакцинирање, од следната недела повторно се отвора пунктот во спортскиот центар „Борис Трајковски“.
Тоа ќе биде малата сала, не големата, и ќе има 20-ина места каде што ќе може да се спроведе вакцинација и ќе ги растовари метежите и редиците што ги има пред здравствените домови.
Вчерашната дневна статистика покажа дека бројот на заразените секојдневно се зголемува. Во претходното деноноќие биле регистрирани 1 250 нови случаи на ковид-19 и 22 починати лица, во споредба со 20 август – 1 074 новозаболени и 22 починати, на 19 август – 1 158 новозаболени и 19 починати, на 18 август 1 081 новозаболени и 15 починати и на 17 август 999 новозаболени и 14 починати.
Само во периодот од 17 до 21 август починати се вкупно 94 лица, додека последен пат без смртен случај е на 3 август.
Вкупната бројка на ковид-дијагностицирани лица во нашата земја од почетокот на епидемијата изнесува 167 991, бројката на оздравени пациенти е 151 957, а на починати е 5 654.