Според МО, набавката оваа година, во споредба со таа направена во 2023 година е со многу помали количини, односно ставката за алкохолни пијалоци е намалена од 50 до 88 отсто, а жестоките алкохолни пијалоци што претходно се набавувани се целосно отстранети
Набавката на кафе и алкохолни пијалоци се однесува на потребите на Армијата и сите угостителски објекти на Министерството за одбрана и Армијата, вклучувајќи ги Домот на АРМ, авто-камповите во Дојран и Охрид, како и хотелот „Шар“ на Попова Шапка, соопштија вечерва од Министерството за одбрана (МО) како одговор на обвинувањата од Социјалдемократскиот сојуз (СДСМ) дека ова оваа институција склучила договори со пет компании за набавка на кафе, вино, ракија, мастика и други алкохолни пијалаци во вредност од 31 илјади евра.
Оттаму велат дека набавеното кафе и пијалоци за овие угостителски објекти што се од отворен карактер за граѓаните, се во слободна продажба, а приходот од неа повторно влегува во буџетот на државата.
„Имајќи предвид дека последните седум години со Министерството раководеа кадри на оваа политичка партија, што ги правеле истите набавки, се поставува прашањето дали тие знаеле што прават, дали се ‘луксузирале‘ со народните пари или сега се обидуваат да стават сомнеж на функционирањето и побарувањето не од која било, туку од најценетата и најпочитуваната институција во државата – македонската Армија“,
се вели во реакцијата на Одбрана.
Во образложението за набавката, од МО велат дека таа е спроведена во јавна и транспарентна постапка, а целата декументација, договорите и одлуките се јавно достапни на Порталот за јавни набавки и секој може да направи увид во нив.
Набавката, како што наведуваат од Одбрана, се однесува на угостителски објекти од отворен тип, што се користат во рамките на протоколарни, воени или меѓународни активности, а не како што се тврди за удобност на министри.
Според МО, набавката оваа година, во споредба со таа направена во 2023 година е со многу помали количини, односно ставката за алкохолни пијалоци е намалена од 50 до 88 отсто, а жестоките алкохолни пијалоци што претходно се набавувани се целосно отстранети.
Сумата на договорот во 2025 година е намалена за 15 отсто во споредба со претходната година и за речиси 40 отсто за разлика од 2023 година.
Следствено на тоа, според МО, или раководството на СДСМ што го предводело ова Министерство не знаело што работи и што набавува или политичката партија влегува во црно сценарио во кое се обидува да ја вметне македонската Армија.