Тројцата лидери се во Италија на саемот за вино „Винитали“ каде што денеска имаа трилатерална средба. Меѓу темите за разговор биле и активности како „Отворен Балкан“ – младински камп, саем за храна, филмски фестивал, но и можноста за отворање на границите
Имплементација на активностите во рамките на регионалната иницијатива „Отворен Балкан“, како и заедничкото учество на меѓународниот саем за вино „Винитали“. Ова биле темите на разговор на трилатералната средба на премиерот Димитар Ковачевски, претседателот на Србија, Александар Вучиќ, и премиерот на Албанија, Еди Рама, што денеска се одржа во Бaрдoлино, Италија.
Како што соопшти Владата, тројцата лидери ќе учествуваат на презентациите на вината од трите земји на заедничкиот штанд на „Отворен Балкан“ на саeмот за вино.
„Беше истакнато дека со заедничкото претставување на саемот „Винитали“, еден од винските саеми со највисок квалитет на глобално ниво, го носиме и промовираме винскиот и туристичкиот квалитет на трите земји поблиску до светската публика и потенцијалните инвеститори. Констатирано е дека на заедничкиот ‘Отворен Балкан’-штанд, македонските, српските и албанските винарии и вина стојат рамо до рамо со светските врвни производители. На заедничкиот настап на трите земји на саемот за вино „Винитали“ се гледа како огромна можност за промоција, вмрежување, привлекување на странски инвеститори и отворање нови пазари“,
велат од Владата.
Во соопштението се вели дека на средбата било потенцирано дека од летово можноста за слободен пристап до пазарот на труд за граѓаните од трите земји станува реалност.
„Правото на пристап до пазарите на труд во трите држави ќе се стекнува многу побрзо и поедноставно, со електронско издавање на ‘Отворен Балкан’-идентификациски број и издаден единствен матичен број за странец од Министерство за внатрешни работи, по извршените соодветни проверки. Со стартот на реализација на овие договори, на лицата кои ќе добијат ‘Отворен Балкан’-идентификациски број им се овозможува непречен престој од две години во кој период имаат право да најдат работа“,
соопшти Владата.
На состанокот било нагласено олеснувањето и забрзувањето на протокот на стоки и подобрувањето на трговската размена меѓу трите земји со воведувањето на зелените ленти на граничните премини.
„Беше поздравено и нагласено потпишувањето на меморандумот за соработка меѓу Северна Македонија и Србија за граничниот премин „Табановце“ со којшто се предвидува инфраструктурно проширување на бројот на сообраќајните ленти на преминот „Табановце – Прешево“, поставување или подобрување на сообраќајните сигнали, како и дополнителна инфраструктурна опрема на овој премин, како и воспоставување нови процедури за гранична проверка за забрзано преминување на патниците и возилата на граничниот премин“,
пишува во владиното соопштение.
На состанокот се разговарало и за можните активности како „Отворен Балкан“ – младински камп, саем за храна, филмски фестивал, но и можноста за отворање на границите меѓу трите земји.