Обвинителството предлага на обвинетиот да му биде изречена кривична санкција, односно условна осуда со која ќе му биде определена казна затвор од три месеци која нема да се изврши доколку тој не стори ново кривично дело во рок од една година од правосилноста на пресудата
Незадоволен од одлука на Уставниот суд во врска со Законот за застареност на долгови, обвинетиот на својот профил на социјална мрежа напишал објава со закани дека ќе убие уставна судијка, директно споменувајќи го нејзиното име, информираат од Основното јавно обвинителството Скопје, од каде што се бараат да му биде изречена казна затвор од три месеци.
Кај оштетената, според Обвинителството, предизвикал чувство на несигурност, загрозување и страв.
„На 21 јуни, преку информатички систем, обвинетиот се заканил дека ќе стори кривично дело – убиство од член 123 став 2 од Кривичниот законик за кое е пропишана затворска казна од најмалку 10 години кон судија на Уставниот суд на Република Северна Македонија. Јавен обвинител од Основното јавно обвинителство Скопје до Основниот кривичен суд Скопје достави предлог за издавање казнен налог против едно лице за кривично дело – загрозување на сигурноста согласно член 144 став 5 од Кривичниот законик“,
се вели во соопштението од Обвинителството.
Со казнениот налог, Обвинителството предлага на обвинетиот да му биде изречена кривична санкција, односно условна осуда со која ќе му биде определена казна затвор од три месеци која нема да се изврши доколку тој не стори ново кривично дело во рок од една година од правосилноста на пресудата.