Станува збор за состанок на лидерите на земјите-членки на НАТО од Југоисточна Европа, на кој премиерите ќе разговараат за последиците од руската агресија во Украина врз безбедноста, енергетиката и економијата
На покана на бугарскиот премиер Кирил Петков, утре во Софија ќе се одржи состанок на лидерите на земјите-членки на НАТО од Југоисточна Европа. На настанот ќе присуствува премиерот Димитар Ковачевски, како и премиерите на Романија-Николае Чука и Црна Гора – Здравко Кривокапиќ, соопшти прес-службата на бугарската влада.
Како што јави дописникот на МИА од Софија, премиерите ќе разменат мислења за последиците од конфликтот во сферите на безбедноста, енергетиката и економијата на краток, долг и среден рок.
Во овој контекст, акцент ќе биде ставен и на зајакнување на координацијата и соработката во Југоисточна Европа за справување со заедничките предизвици.
По завршувањето на работната сесија, учесниците на состанокот треба да имаат и брифинг со медиумите.