Судскиот процес по обвинителниот предлог во кој се опфатени три лица треба да започне на 2 март, додека за оној во кој се обвинети деветмина полициски служби е закажан три дена подоцна, односно на 5 март. Судењата ќе се одвиваат во судницата 1 во скопскиот Основен кривичен суд
За обвинението против 13 полициски службеници сè уште не е закажан почетокот на судењето бидејќи предметот треба да го помине филтерот пред Советот за оценка на обвинителен акт
Основниот кривичен суд Скопје за почетокот на март го закажа стартот на судењата против дел од полициските службеници, обвинети за поврзаност со настани во т.н. кабаре „Пулс“ во Кочани, каде на 16 март лани во пожар загинаа 63 лица, а повеќе од 200 беа повредени.
За потсетување, на 30 јануари Основното јавно обвинителство за гонење организиран криминал и корупција (ОЈО ГОКК) поднесе три обвиненија, односно еден обвинителен акт и два обвинителни предлози.
Закажаните судењата се однесуваат на полициските службеници кои се опфатени со обвинителните предлози, за кои не треба оценка од надлежен совет, односно за нив процедурата оди по скратена постапка.
Судскиот процес по обвинителниот предлог во кој се опфатени три лица треба да започне на 2 март, додека за оној во кој се обвинети деветмина полициски служби е закажан три дена подоцна, односно на 5 март. Судењата ќе се одвиваат во судницата 1, во скопскиот Основен кривичен суд.
Во првиот случај тројца полициски службеници се обвинети за кривичното дело злоупотреба на службената положба бидејќи, според Обвинителството, при изготвување на службени записници внесувале неточни податоци и овозможиле неправилно водење прекршочни постапки. Наместо на име на активниот субјект, пишувале прекршочни пријави на фирма која не е активна.
„Обвинетите, при изготвување на записници за извршена контрола во клубот во кои констатирале сторени прекршоци, а внеле неточни податоци за правното и одговорното лице и дозволиле да бидат поведени прекршочни постапки против неактивно правно лице и физичко лице со намера за правното и физичкото лице да прибават имотна корист“,
наведоа од ОЈО ГОКК на 30 јануари.
Деветтемина полициски службеници кои се гонат со другиот обвинител предлог, исто така се товарат за злоупотреба на службената положба и овластување, но за нив Обвинителството смета дека не извршиле целосна и детална проверка при издавање согласност за добивање лиценца на т.н. кабаре „Пулс“ во Кочани. Имено, тие биле задолжени за проверки од аспект на јавниот ред и мир и сообраќајната безбедност, и потпишале дека т.н. кабаре ги поседува предвидените најмалку 20 паркинг-места, иако тоа не било случај.
„Овозможиле истото да добие лиценца за 2022 и 2023 година, а со намера да прибават имотна корист за правното лице во вкупен поголем износ од 284 576 денари за 2022 година и имотна корист за неформалниот сопственик на клубот, во вкупен поголем износ од 335 916 денари бруто-плата“,
појаснија тогаш од Обвинителството.
На 30 јануари, ОЈО ГОКК поднесе и обвинителен акт против 13 полициски службеници, од кои девет се полицајци, а четири началници – двајца од ОВР Кочани и двајца од Штип.
Во овој предмет обвинетите се товарат дека како соизвршители сториле кривично дело тешки дела против општата сигурност. Според Обвинителството, тие од 14 до 16 март – денот кога се случи трагедијата, одобриле и спровеле план за акциска контрола без да проверат дали тој ги има опфатено сите проверки што се во нивна надлежност, ниту, пак, дали се почитувани одредбите од стандардните оперативни процедури за проценка и управување со ризик при вршење полициски работи. Кобната ноќ влегле во „Пулс“ во 2:20 часот по полноќ, по усна наредба, а пиротехниката се активирала среде контролата.
Обвинителството ги товари дека кога ја спроведувале акциската контрола во „Пулс“, не презеле мерки за заштита на присутните лица, ниту мерки за спречување активирање на пиротехничката опрема на сцената, која не била пријавена во ПС Кочани.
„Како последица на несоодветните услови за работа во текот на акциската контрола, настанал пожар, при што придонеле за настапувањето смрт на 63 лица, а 223 се здобиле со тешки телесни повреди и телесни повреди“,
наведоа од ОЈО ГОКК дента кога ги поднесоа обвинителниот акт и обвинителните предлози.
За обвинението против 13 полициски службеници сè уште не е закажан почетокот на судењето бидејќи предметот треба да го помине филтерот пред Советот за оценка на обвинителен акт.
Истовремено со поднесените обвиненија, ОЈО ГОКК донесе и наредба за запирање на истражната постапка за седум полициски службеници, на кои им се ставаат на товар дејствија што ги презеле во временскиот период од 2012 до 2022 година. Со оглед на тоа што надлежноста на Специјализираното одделение на ОЈО ГОКК е од 2018 година, Обвинителството ќе ги цени само дејствијата преземи од 2019 до 2022, додека за другите предметот е испратен на надлежно постапување во ОЈО Кочани.
Повикувајќи се на овој момент од одлуката на ОЈО ГОКК, дел од бранителите на обвинетите за пожарот во т.н. кабаре „Пулс“, за кои е во тек судската постапка, побараа од Обвинителството да го преиспита обвинението и делата што им се ставаат на товар на нивните клиенти бидејќи се поклопуваат со оние за кои е запрена постапката против седумтемина службеници.
„Го замолувам Јавното обвинителство да го преиспита своето мислење и став. Ако за полицајците не може да биде поведена постапка за загрозување на општата сигурност тогаш Обвинителството треба да каже за кои лица овде обвинетите може да им се стави на товар ова дело. Наместо да продолжиме мислам дека е поцелисходно Обвинителството да утврди за кои лица може да се води постапка. Еден ден судење државата ја чини 150 000 евра што укажува на неекономичност на судењето”,
рече бранителот на обвинетиот службеник во Министерството за економија, Шофкет Хазари, адвокатот Петре Шилегов, на чиј став се придружија и дел од другите адвокати.
Инаку, за пожарот во „Пулс“ е во тек еден судски процес кој опфаќа 35 физички и три правни обвинети лица. Меѓу нив се сопственикот на „Пулс“, негови блиски, инспектори на државни институции, поранешни министри и припадници на агенцијата што го обезбедувала т.н. кабаре и нејзиниот сопственик.