Говорејќи за, како што ја нарече, коалицијата СДСМ-ДУИ-Левица, Мицкоски рече дека не станува збор за сојуз „во обланда“, туку за јавно и јасно профилирана коалиција
Одговарајќи на дополнително прашање, премиерот рече дека очекува мирна, но и кампања во која, како што кажа, опозицијата ќе испраќа пораки што ќе бидат збунувачки и невистинити
Премиерот Христијан Мицкоски вели дека очекува мирна изборна кампања за локалните избори закажани за 19 октомври, а во однос на понудените опции, кажа, дека има само две.
Едната опција, како што кажа денеска одговарајќи на новинарски прашања во Општина Градско, е коалицијата меѓу СДСМ, Демократската унија за интеграција и Левица, а од друга страна е коалицијата предводена од ВМРО-ДПМНЕ.
Надоврзувајќи се на овие свои тврдења, Мицкоски, додека ги набројуваше лидерите на трите партии, за малку ќе направеше јазична грешка и ќе ги споеше името на претседателот на Левица, Димитар Апасиев, со презимето на поранешниот лидер на СДСМ и експремиер, Зоран Заев.
„Тоа е коалицијата Венко Филипче, Али Ахмети и Димитар За…Апасиев. Па, и да кажев Димитар Заев немаше многу да погрешам ако направам една кованица бидејќи тој е гуруто во позадина на оваа коалиција, и тоа е патот што го гледавме седум години. Пат на криминал, корупција, национални понижувања, неработа, неиспорака. Тоа е тој пат“,
рече премиерот.
Другата опција што граѓаните можат да ја одберат на овие локални избори, според Мицкоски, е онаа на коалицијата, предводена од неговата партија ВМРО-ДПМНЕ.
Говорејќи за, како што ја нарече, коалицијата СДСМ-ДУИ-Левица, Мицкоски рече дека не станува збор за сојуз „во обланда“, туку за јавно и јасно профилирана коалиција.
Според премиерот, на овие локални избори нема трета опција, а секој што ќе избере да остане дома и да не излезе на своето избирачко место, како што рече, директно ќе гласа за коалицијата на СДСМ, ДУИ и Левица.
„Трета опција не постои. Секој оној којшто смета дека со седење дома ќе казни некого или ќе покаже пркос, или, пак, ќе испрати некаква порака, се лаже. Тогаш тој директно гласа за Венко Филипче, за Али Ахмети и за Димитар Апасиев. Тоа е опцијата, од една страна е коалицијата на ВМРО-ДПМНЕ, од друга страна се овој трилинг на асови – Венко Филипче, Димитар Апасиев и Али Ахмети“,
рече Мицкоски.
Одговарајќи на дополнително прашање, премиерот рече дека очекува мирна, но и кампања во која, како што кажа, опозицијата ќе испраќа пораки што ќе бидат збунувачки и невистинити.
„Еве денеска, да речеме, повторно медиумите во Македонија, но и оние статистики во Европа, Евростат, ја демантираат опозицијата, која велеше дека не растеле платите. Еве тие велат дека Македонија е шеста во Европа, во конкуренција на земјите од Европската Унија, како и земјите коишто се кандидати за членство во ЕУ. Зборувам за јули месец оваа година, споредено со јули месец минатата година. Така што, сите пораки се темелат на лаги, конструкции, подметнувања“,
рече Мицкоски.
За дел од опозицијата рече дека сè уште живее во 1990-тите години од минатиот век и испраќа такви пораки.
„Дел од опозицијата уште живее во 1990-тите години од минатиот век, пред три, четири, пет децении и испраќа такви пораки, пораки кои можеби би биле добри за крајот на 19, почетокот на 20 век. Тоа е она што го нуди опозицијата, и она коешто го нудиме ние во нашите пораки и во кампањата, а тоа ќе бидат проекти и визија како гледаме да ја развиваме Македонија. Тоа е суштинската разлика помеѓу едната коалиција, ќе повторам, коалицијата на СДСМ, Левица и Демократската унија за интеграција и другата коалицијата што ја предводи ВМРО-ДПМНЕ“,
подвлече премиерот.
Инаку, во предвечерјето пред официјалниот почеток на изборната кампања, лидерот на ДУИ, Али Ахмети, од конвенцијата на „Националната алијанса за интеграција“ (името на коалицијата што ја предводи ДУИ за локалните избори) вчера во Скопје, му порача на Мицкоски дека е млад и оти со кучиња не се оди во лов на орли.
На пораките на лидерот на ДУИ веднаш реагираа од ВМРО-ДПМНЕ, од каде што наведоа дека Ахмети не е орел, туку врапче кое ќе носи писма со понуди откако ќе загуби на изборите.