Ваквите наводи, во изјава за ТВ Телма ги изнесе анонимна 64-годишна пациентка што на Клиниката се лекува од рак на бели дробови, дијагностицан во четврти стадиум на болеста. Од препишаните четири хемотерапии, примила една на 28 мај, но кога требало да ја прими втората, закажана за 18 јуни, за неа немало терапија, со образложение дека се уште не пристигнале набавените лекови за нејзиниот тип на канцер
На Клиниката за онкологија има недостиг на терапија за дел од пациентите што се лекуваат од рак на бели дробови, објави ТВ Телма.
Ваквите наводи, во изјава за ТВ Телма ги изнесе анонимна 64-годишна пациентка што на Клиниката се лекува од рак на бели дробови, дијагностицан во четврти стадиум на болеста.
Од препишаните четири хемотерапии, примила една на 28 мај, но кога требало да ја прими втората, закажана за 18 јуни, за неа немало терапија, со образложение дека се уште не пристигнале набавените лекови за нејзиниот тип на канцер.
„На 18 јуни ми беше закажана втората терапија. Чекам да ми се јават затоа што ми рекоа дека немаат лекови за хемотерапија. Поминати се две недели, уште не ми се јавиле да ми кажат што е проблемот. Ми рекоа дека до седум дена ако не ја примам терапијата, нема да имам проблем. Е сега, ни јас не знам што би требало поната да се прави. Никој не ми се јави да ми објасни, ниту ми се јави да ми каже дали има некоја замена и што треба да се прави. Едноставно чекам дали ќе добијат терапија и кога ќе добијат“,
вели пациентката, што не го откри идентитетот пред камерата на ТВ Телма од страв дека потоа може да има проблеми во процесот на лекување.
Таа сега е пензионерка, но посочи дека целиот животен век плаќака здравствено осигурување.
На денешната прес-конференција на министерот за здравство, Азир Алиу му беше поставено прашањето зошто нема терапија за дел од пациентите на Онкологија, за што рече дека разговарал со директорот на Клиниката дека терапијата е набавена, но не е сигурен дали ја има за сите пациенти.
„Мислам дека терапијата не само што е стигната, туку е и процесуирана. Значи дадена е на пациентите. Но, утре ќе се сретнам со директорот и ќе видам што е проблемот и дали можеби дел од некои од елементите внатре во терапијата се стигнати или не. Денеска немам информација за тоа“,
рече Алиу.
Директорот на Клиниката за онкологија, Игор Стојковски пред два дена изјави дека во моментов лековите за болните од рак се достапни, но дека постои можност повремено да се појави недостиг, како резултат на повеќе фактори што се надвор од контрола на установата со која раководи.
Тие фактори, како што посочи, се зголемен број на пациенти, административни процедури поврзани со јавните набавки, како и доцнење во испораката од страна на производителите и дистрибутерите.