Матичните клетки патувале од Келн, преку Брисел и Атина, до Скопје, а биле неопходни за спроведување несродна трансплантација – единствена терапевтска опција за пациентка дијагностицирана со апластична анемија, велат од Клиниката
И покрај исклучително сложените услови поради мерките за справување со пандемијата од ковид-19, деновиве со поддршка од Министерството за здравство, до Универзитетската клиника за хематологија во Скопје беше обезбеден високостандардизиран транспорт на пратка матични клетки, добиени од коскена срцевина од несроден донор од Германија. Матичните клетки патувале од Келн, преку Брисел и Атина, до Скопје, соопштија од Клиниката.
Овој материјал бил неопходен за спроведување несродна трансплантација, како единствена терапевтска опција за пациентка дијагностицирана со апластична анемија.
„Огромна среќа за секој пациент што очекува можност за да остане во живот, е кога во Светскиот регистар за коскена срцевина, воопшто, ќе се појави компатибилен донор. Но, чин на немерлива хуманост е кога тој донор во време на корона, доброволно ќе влезе во операциона сала и ќе донира коскена срцевина за да спаси живот на непознат примател некаде во светот“,
велат од Клиниката за хематологија.
Притоа, потсетуваат дека апластичната анемија и малигните хематолошки болести се посмртоносни од ковид-19 и нивниот третман не смее да биде одложен и во вонредни услови на пандемија.
На Клиниката за хематологија постапката за трансплантација е реализирана веднаш по пристигањето на материјалот во четвртокот навечер (30 април 2020 г.).
„Овој пример е потсетување за сите нас дека и во време на корона не треба да заборавиме на хуманоста, на можноста да се биде донор и да се подари живот. Можеби некој, некаде, чека токму на вашите клетки за да продолжи да живее“,
порачуваат од Клиниката.