Министерот Фатмир Меџити денеска ја посетил донорката на матични клетки – млада девојка, воедно и докторка, и ѝ се заблагодарил за извонредната храброст и за несебичната посветеност да спаси туѓ живот
На Универзитетската клиника за хематологија во Скопје денеска млад семеен лекар донира хематопоетски матични клетки, со што ќе спаси живот на пациент кој се соочува со тешка малигна хематолошка болест, а трансплантацијата на матичните клетки е единствената терапевтска опција, информираа попладнево од Министерството за здравство.
Министерот Фатмир Меџити ја посетил донорката на матични клетки – млада девојка, воедно и лекарка, и ѝ се заблагодарил за извонредната храброст и за несебичната посветеност да спаси туѓ живот.
„Нејзиниот чин на хуманост и солидарност е надеж, потсетувајќи нè на моќта на заедницата и љубезноста во моментите кога тоа е најпотребно. Им честитам и на колегите од Клиниката за хематологија кои ја практикуваат оваа современа метода во медицината, со која еден човек има шанса за нов почеток“,
се наведува во писмената изјава на министерот.
Директорката на клиниката за хематологија Ирина Пановска-Ставридис изјавила дека станува збор за редок пример, донорот на матични клетки и пациентот кој треба да ги прими да не се во роднинска врска ниту, пак, се познавале, а нивните клетки се совпаѓале.
„Денешниот чин на докторката е уште еден чекор до задоволството да се биде лекар и да се спасуваат животите на луѓето. Младата докторка која е донор на матичните клетки, во Македонскиот регистар на доброволни дарители на коскена срцевина при Институтот за имунологија и хумана генетика се пријавила уште кога била студент по медицина, а минатиот месец беше идентификувана како евентуален донор. Не се двоумеше ниту миг, веднаш се согласи да му даде шанса за живот на пациент кој не го познава, а боледува од акутна леукемија“,
се истакнува во пишаната изјава на Пановска-Ставридис.