На граничниот премин (ГП) со Република Бугарија, кај Делчево, фатени се тројца патници кои сакале да ја преминат границата со фалсификувани негативни ПЦР-тестови за ковид-19.
Станува збор за момче од Виница (20 години) и двајца државјани на Турција (28 и 30 години). На граничниот премин тие приложиле негативни ПЦР-тестови, но по извршените проверки надлежните утврдиле дека станува збор за фалсификати.
Тројцата патници биле предадени на инспектори од Регионалниот центар за гранични работи Исток, а надлежните најавуваат и понатамошна постапка против нив.
Ова не е првпат на граничните премини да се приложуваат фалц негативни ПЦР-тестови. Денеска, Основното јавно обвинителство – Скопје информираше дека со условна казна е завршена постапката против сопружници кои на скопскиот аеродром пред три дена приложија фалц тестови.
Пред две недели, пак, на „Деве Баир“ беше откриен цел автобус со патници кои приложиле фалсификувани негативни ПЦР-тестови. Стануваше збор за 30 лица, од кои 28 македонски, а двајца албански државјани кои патувале со туристичка агенција од Скопје.