На последниот ден од кампањата, тимот на Камала Харис е оптимист за нејзините шанси за победа во исклучително тесната трка
Луѓето околу Трамп тврдат дека поранешниот претседател ќе освои шест од седумте клучни држави, пренесува Би-би-си
На последниот ден пред изборите во Америка, двајцата кандидати Камала Харис и Доналд Трамп на митинзи ќе се борат за секој преостанат глас во „мртвата“ трка за позицијата во Овалната соба. Камала Харис денеска треба да се појави во градовите Алентаун, Питсбург и Филаделфија во Пенсилванија, а Трамп ќе биде во Северна Каролина пред да се појави во Пенсилванија и Мичиген.
Камала Харис, која честопати остро го критикуваше Трамп, сега престана да го спомнува неговото име и рече дека сака да ја заврши кампањата на попозитивен тон.
На последниот ден од кампањата, тимот на Камала Харис е оптимист за нејзините шанси за победа во исклучително тесната трка.
Соработниците на кампањата веруваат дека трката останува многу неизвесна, но велат дека се охрабрени од јавните и внатрешните анкети кои покажуваат дека мал дел од неопределените гласачи сè уште се наклонети кон Харис.
„Полесно ни е да дојдеме до тие гласачи отколку Трамп“,
вели претставник на кампањата за Би-би-си.
Претставниците на кампањата истакнаа дека одѕивот ќе биде клучен за победата, но велат дека внатрешните податоци покажуваат дека Харис останува фаворит меѓу жените и постарите гласачи во сојузните држави.
Соработниците на Камала Харис нагласуваат дека имаат уште работа во следните 24 часа, но велат дека нивното внатрешно истражување и предвременото гласање покажуваат дека Харис ги достигнува, а на некои места и ги надминува бројките што ги постигнал Џо Бајден во неговата победа во 2020 година.
Камала Харис на митинг на Државниот универзитет во Мичиген рече дека ќе направи сè што е во нејзина моќ за да ја прекине војната во Газа. Според пишувањата на Би-би-си, оваа порака не случајно била испратена во Мичиген, каде што има најмногу Американци со арапско и муслиманско потекло.
Луѓето околу Трамп тврдат дека поранешниот претседател ќе освои шест од седумте клучни држави, пренесува Би-би-си додавајќи дека тоа можеби е причината зошто Харис одржува митинзи таму каде што Трамп обично не победува.
Трамп во петокот одржа митинг во Вирџинија, држава каде што загуби со голема разлика во 2016 и 2020 година. Неговиот потпретседателски кандидат Џеј-Ди Венс вчера застана во Њу Хемпшир, држава за која советниците на Трамп велат дека е „во игра“ и покрај фактот што анкетите покажуваат дека Камала Харис таму води со неколку процентни поени.
Доналд Трамп од митинг во најголемиот град со арапско мнозинство – Дирборн упатуваше пораки и го искористи гневот на дел од Американците со арапско потекло критикувајќи го начинот на кој демократите се справуваат со конфликтот на Блискиот исток и финансиската поддршка за Израел.
На митинг, пак, во Литиц, Пенсилванија, Трамп рече дека никогаш не требало да замине од Белата куќа.
„Денот кога заминав ја имавме најбезбедната граница во историјата на нашата земја. Не требаше да заминам, мислам искрено, направивме толку добра работа“,
рече тој.
На митингот во Мејкон, Џорџија, Доналд Трамп рече дека ќе му даде улога во здравствената политика на Роберт Кенеди Џуниор.