Собранискиот спикер, иако смета дека интерпелацијата за него не е политички издржана, сепак вели дека ќе ја почитува одлуката на мнозинството, каква и да биде таа
На собраниската седница закажана за 3 септември прва точка на дневен ред ќе биде интерпелацијата за претседателот на Собранието Африм Гаши, поднесена од пратениците на Левица.
Собранискиот спикер, иако смета дека интерпелацијата за него не е политички издржана, сепак вели дека ќе ја почитува одлуката на мнозинството, каква и да биде таа.
Гаши, на денешниот прв брифинг со новинарите, рече дека е добро тоа што на седницата ќе се расправа и ќе може да ѝ се објаснат на јавноста наводите што се поднесени во таа интерпелација.
„Сè што е во рамки на Деловникот и во рамки на демократичноста во Собранието, го почитувам, било тоа да се однесува на институцијата претседател на Собранието или на кого било. Ќе бидеме отворени кон секоја иницијатива, ќе го почитуваме Деловникот и се надевам дека на 3 септември ќе има соочување на аргументи и потоа пленумот ќе одлучи. Како што ќе одлучат тие така ќе постапиме. Верувам дека мнозинството ќе ја донесе најправедната одлука. Таа каква и да биде, ќе ја почитувам“,
рече Гаши.
Претседателот на Собранието, осврнувајќи се на неколкуте забелешки и на тврдења во самото барање за интерпелација, рече дека не направил никаква повреда на секуларноста, како и дека не побарал од никого да бидат прекршени меѓународните или домашните закони.
Негова цел како претседател, вели Гаши, е да ја промени перцепцијата дека Собранието е машина за гласање, како и дека пратениците ќе бараат одговори и одговорност од министрите и од функционерите и дека ќе има поголема соработка со граѓанскиот сектор.
Интерпелацијата за Гаши е заснована на седум точки, образложени на десет страници. Во барањето за интерпелација се наведува дека спикерот Гаши уште од почетокот на неговото назначување работи своеволно, нестручно, несовесно и непрофесионално и згора на сѐ противзаконски, неуставно и неделовнички.
Според Левица, Гаши ја повредил секуларноста на државата кога на собраниска седница за одбележување на геноцидот во Сребреница заедно со други присутни извел групна верска молитва.
Како втора причина за барање одговорност од собранискиот спикер пратениците на Левица го наведуваат инцидентот со косовската претседателка Вјоса Османи на скопскиот аеродром.
По инцидентот со Османи, во кој учествуваше шефот на обезбедување на собранискиот спикер, кој доби кривична пријава и отстранување од работното место, и од СДСМ побараа итна смена на Гаши.
Од владејачката ВМРО-ДПМНЕ, пак, сметаат дека не е потребна смена на собранискиот спикер, а обвинувањата од опозицијата ги оценуваат како обиди „да се ќарат политички поени“. Интерпелацијата за Гаши, според „Вреди“, е обид да се предизвика политички земјотрес и да се стави на тест владиното мнозинство.