Ставот на министерот, велат од неговиот Кабинет, кон неконструктивната критика од опозицијата за неговата работа и работата на Комисијата за здравство останува
Видеото на кое папагали извикуваат „оставка, оставка“, во комбинација со инсерти од партиските членови на опозициската ВМРО-ДПМНЕ што беше објавено вчера, било повлечено поради реакциите на граѓани.
Видео содржината беше објавена на официјалните профили на социјалните мрежи кои ги користи министерот за здравств, Венко филипче, но за неколку минути беше повлечено.
„Видеото кое беше објавено на социјалните мрежи на министерот за здравство, Филипче е пародија на неоснованите критики на опозицијата кон неговата работа како министер за здравство во време на светска пандемија. Сепак, заради дел од коментарите на граѓаните кои сметаа дека содржината е несоодветна, со сета почит кон нив, видеото е повлечено“,
ни одговорија од Министерството за здравство.
Ставот на министерот, велат од неговиот Кабинет, кон неконструктивната критика од опозицијата за неговата работа и работата на Комисијата за здравство останува.
„Во вакви услови, без разлика на политичката опција, секој има одговорност“,
додаваат од министерството за здравство.
На видеото беа прикажани инсерти од лидерот на опозициската ВМРО-ДПМНЕ, Христијан Мицкоски, негови сопартијци, но и ставови за ковид-19 од д-р Вело Марковски кои биле објавувани во медиумите. По секој од тие инсерти, се појавуваа папагали кои извикуваа „оставка, оставка“, а во видеото имаше кадар и од филм со Џим Кери.
За објавата на видеото следеа реакции од граѓани на социјалните мрежи, кои велат дека во ден кога земјава регистрира 21 починато лице од ковид-19, невкусно е да се објавува таква содржина токму од профилите на министерот за здравство.
Одговор не добивме на прашањето дали министерот сам ги уредува неговите профили на социјалните мрежи или има тим што е задолжен за тоа.
Од опозициската ВМРО-ДПМНЕ за видеото реагираа уште вчера и велат дека ПР-пародиите нема да ја дефокусираат јавноста за лошото менаџирање со кризата. Според нив, неодговорно е тоа што министерот наместо да спасува животи објавува пародии и видеа со папагали.
„Додека бележиме двоцифрени бројки на починати лица ти се забавуваш на социјалните мрежи. Џим Кери видео на ден во кој бележиме 21 починато лице е одлика на министер? Желен за власт, желен за лајкови, заробен во својата суета сееш ароганција и омаловажуваш. Залудно бришеш, очајот е трајно запишан“,
рече Марија Митева од ВМРО-ДПМНЕ на денешната прес-конференција.