Некој со хебла ја отворил и оштетил таблата за електрична струја од модуларната болница во Прилеп каде во моментов се сместени 17 пациенти. Вандализмот, велат од Министерството за здравство, не ги довел во опасност животите на пациентите и струјата е во функција бидејќи опремата во болницата не се снабдува со струја преку оваа надворешна табла.
Од Општата болница Прилеп синоќа случајот го пријавиле и во МВР.
„Обезбедувањето на болницата забележало дека таблата од надворешната страна на болницата е отворена со хебла и го известиле електричарот од болницата, а веднаш била повикана и полиција. Струјата во модуларната болница е во функција, бидејќи надворешната табла не врши дотур на електрична енергија на опремата во болницата. Во модуларната болница има хоспитализирано 17 пациенти, вандализмот не довел да се загрози животот на пациентите“,
велат од Министерството за здравство.
Здравствените власти апелираат до останатите институции што побрзо да го расчистат случајот со оштетувањето на таблата за електрична енергија.