Вакцините од производителот „Фајзер“ кои треба да пристигнат како донација од Бугарија, ќе бидат аплицирани за 5 до 7 дена од нивната дистрибуција на пунктовите, велат од Министерството за здравство
Вакцините против ковид-19 на производителот „Фајзер“ што Бугарија ќе ги донира во земјава ќе бидат аплицирани пред истекот на нивниот рок. Ова го соопшти Министерството за здравство по реакциите во јавноста дека вакцините што треба да пристигнат имаат рок до 30 септември.
„Согласно точните проекции за потребите за ревакцина со вакцината на ‘Фајзер’, како и големиот интерес за прва доза од овој производител, сите дози ќе бидат аплицирани далеку пред истекување на рокот на важност. Вакцините од производителот ‘Фајзер’ кои треба да пристигнат како донација од Република Бугарија, ќе бидат аплицирани за 5 до 7 дена од нивната дистрибуција на пунктовите. Согласно договорот со Република Бугарија, вакцините ќе бидат достапни на 14 септември на нашите пунктови што значи дека има повеќе од доволно време да се искористат и ниедна да не биде уништена“,
велат од Министерството за здравство.
Според Министерството, просекот на дневно аплицирани дози е околу 10 000 вакцини и најголем процент од нив се токму од производителот „Фајзер“.
„Оттаму граѓаните може да бидат спокојни дека сите вакцини ќе бидат безбедни и со важечки рок во моментот на вакцинирање. Министерството во оваа прилика изразува благодарност до Владата на Република Бугарија за донацијата. Апелираме граѓаните масовно да се вакцинираат како би се заштитиле од вирусот“,
велат од Министерството.
Бугарското собрание денеска ја ратификуваше спогодбата за донација на С Македонија на 51 480 дози од вакцината на „Фајзер“. Бугарскиот министер за здравство, Стојчо Кацаров, пред гласањето во собранието рече дека ако не биде денеска изгласана ратификација, вакцините нема да можат да бидат донирани.