Од Министерството информираат дека по добиените пријави од утринава, бил формиран оперативен штаб при што биле ангажирани сите надлежни и стручни полициски служби
Полицијата ги заврши сите проверки и контроли во врска со стотиците електронски дојави за наводно поставени бомби во основни и средни училишта во земјава. Во сите случаи станува збор за лажни пријави, информираат попладнево од Министерството за внатрешни работи (МВР).
„Министерството ја информира јавноста дека во насока на ефикасно, планско и координирано дејствување, а по утринските пријави за упатени закани по електронски пат, беше формиран и оперативен штаб и беа ангажирани сите надлежни и стручни полициски служби. Министерството уште еднаш апелира до граѓаните за избегнување од секакви дезинформации и шпекулации по однос на оваа појава“,
соопштија од МВР.
Претходно денеска директорот на Бирото за јавна безбедност (БЈБ), Александар Јанев, изјави дека во текот на денешниот ден стигнале над 240 дојави за поставени бомби во училишта низ земјава.
Јанев вели дека се истражува која е целта и заднината на лажните дојави и додава дека во оваа насока се соработува со партнерите од Интерпол и Европол. Според неговата изјава, МВР ќе ги преземе сите превентивни и репресивни мерки доколку има потреба и ќе открива зошто се прават вакви лажни дојави.